Qırım MC prokurorı İgor Ponoçovnıy qadılarnı Rusiye işğal etken Qırımda devlet hainliginen qabaatlanğanlarğa ğıyabiy ükümlerni faal şekilde çıqarmağa çağırdı.
Bunı o, «Adalet dünyanıñ inkişafınıñ bir qısmı olaraq: Ukraina içün tesirli bir model qıdıruvı» adlı muzakere zamanı bildirdi.
«Körünip tura ki, ğıyabiy mahküm etme protsedurası Qırım davalarında adalet semereligini arttırmalı, lâkin pek az olğan ğıyabiy ükümlerniñ miqdarını köz ögüne alsaq, ğıyabiy davalarnıñ qadıları ile bağ qurmaq kerek olğanını añladıq», – dedi o.
Onıñ sözlerine köre, mahkeme organlarına bu saada faal şekilde mahkeme tecribesini inkişaf ettirip başlamaq kerekler.
2020 senesi oktâbr ayı itibarınen, Qırımda yarımadanıñ işğali vaqıtnda yüz bergen cinayetler ile bağlı ukrain mahkemeleri 30 üküm çıqardı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
