Qırım Muhtar Cumhuriyetiniñ prokuraturası Rusiye işğali altındaki Qırımda Qırımtatar Milliy Meclisiniñ reis muavini İlmi Umerovnıñ ükmüni çıqarğan qadığa qarşı qabaatlayıcı qararnı mahkemege yolladı.
Müessiseniñ matbuat hızmeti bildirgenine köre, Qırım Muhtar Cumhuriyeti Aqmescit rayon mahkemesiniñ sabıq qadısı Ukraina Ceza kodeksiniñ 111-inci maddesiniñ 1-inci qısmına istinaden (devlet hainligi) cinayet işlegeninden şübheli sayıla. Maddege köre on yıldan on beş yılğa qadar apis cezası berile bile.
Prokuraturanıñ versiyasına köre, Qırımnıñ Aqmescit rayon mahkemesiniñ qadısı 2014 senesi Rusiyeniñ yarımada işğali vaqtında qanunsız qurulğan Rusiye mahkeme organlarına hızmetke keçti.
«Rusiyege Ukrainağa qarşı bozuv faaliyetini kerçekleştirmege yardım etip, işğalci idareniñ tiklenmesi ve pekitilmesine yardım etti. Vaqtınca işğal etilgen yarımadada adliyeniñ Ukraina qanunlarına köre olmaq kerekligini, Rusiye qanunlarına köre cinaiy taqipniñ qanunsız olğanını añlap, Ukrainağa faal qol tutqan Qırımtatar Milliy Meclisiniñ reberlerinden birini eki yılğa azatlıqtan marum etti. Al-azırda şübheli insan qıdırıla», – dep aytıla haberde.
2019 senesi oktâbr ayında Qırım Muhtar Cumhuriyetiniñ Prokuraturası Qırımtatar Milliy Meclisiniñ reis muavini İlmi Umerovnıñ ükmüni ilân etken Kreml kontrolindeki Aqmescit rayon mahkemesiniñ qadısına şübheli olğanını bildirdi.
Prokuratura qadınıñ adını aydınlatmay. Açıq menbalarda olğan malümatqa köre, laf Qırımtatar Milliy Meclisiniñ reis muavini İlmi Umerovnıñ ükmüni çıqarğan Andrey Kulişov aqqında kete.
2016 senesi FSB tahqiqatçıları ekstremizm maddesi boyunca İlmi Umerovğa qarşı cinaiy dava açtı.
Tutuv, tintüv ve cinaiy davanıñ açılması, Meclis reisiniñ muavini, qırımtatar milliy areketiniñ meşur iştirakçisi İlmi Umerovnıñ mecburiy mahkeme-psihiatrik ekspertizasını keçirmek içün psihiatrik hastahanesinde tutuv küçlü bir cemaat ve halqara rezonansına sebep oldı.
Kreml kontrolindeki Aqmescit rayon mahkemesi 2017 senesi sentâbrniñ 27-nde Umerovnı eki yıl yaşav tarzı koloniyasında qalmasına üküm etti. Oña eki yıl açıq faaliyetnen oğraşmağa ve kütleviy haber vastalarında çıqışta bulunmağa yasaq ettiler. Umerov, oña qarşı açılğan cinaiy davanı siyasiy sebepli dep adlandırdı.
2017 senesi oktâbrniñ 25-nde Rusiye akimiyeti Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Umerovnı azat etip, olarnı Türkiyege teslim etkenler, daa soñra Umerov ve Çiygoz Kyivge kelgenler.
