Qırım Muhtar Cumhuriyetiniñ prokuraturası yarımada ilhaqı vaqtında Qırım Muhtar Cumhuriyeti ve Aqyarnıñ uquq qoruyıcı organlarında çalışqan 21 000-den ziyade insannıñ anketa malümatlarını ögrendi. Bu aqta prokuraturanıñ saytında haber etile.
«Bu şahıslarğa qarşı mahkemeden evel tahqiqat keçirile, onıñ çerçivesinde devlet hainligine ya da diger cinayetlerge alâqası bar olğanını isbatlaycaq delillerni elde etmek ve uquq qoruyıcı organlarınıñ er bir hadimine nisbeten qanunğa uyğun bir qarar çıqarmaq içün kerekli tedbirler alına. Qırım Muhtar Cumhuriyetiniñ prokuraturası Qırım Muhtar Cumhuriyeti ve Aqyarnıñ 16 uquq qoruyıcı organınıñ sabıq hadimleri tarafından Ukraina Ceza kodeksiniñ 111-inci maddesiniñ 1-inci qısmındaki (devlet hainligi) cinayet işlengeninen bağlı aktual davalarda mahkemeden evel tahqiqat keçire», – dep qayd ete prokuratura.
Mart ayında QMC prokuraturası Rusiyeniñ Qırım işğaline yardım etken 87 Qırım ve Aqyar deputatına qarşı qabaatlav aktını mahkemege yolladı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
