QMC-nde Zelenskıynıñ vekili Anton Korineviç Ukrainanıñ tamır halqaları aqqında qanunnıñ qabul etilmesiniñ ne qadar müim olğanını qayd etti. Bunı o brifing vaqtında ayttı, bildirile Zelenskıy ofisiniñ saytında.
Hususan, Korineviç, Ukrainada Qırım yarımadasına alâqası olğan üç tamır halqnıñ bar olğanını qoştı, bu - qırımtatarlar, qaraylar ve qırımçaqlar.
"İş yapıla. İyül 8-inde Ukraina Yuqarı Radasında insan aqları ve işğalden boşatıluv meselesi boyunca diñlev olacaq. Menimce, bu meselede müsbet progress olmaq mümkün. Eminmiz ki, tamır halqlarnıñ aq-uquqlarınıñ qanuniy tertiplevi mıtlaq yapılmalı", - qayd etti o.
2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil olmaqta.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
