Qırım Muhtar Cumhuriyeti musulmanları diniy idaresi, ukrainalı tedqiqatçı Mihail Yakuboviçniñ «Qırım hanlığınıñ islâm mirası» kitabını ukraince ve qırımtatarca basıp çıqardı. Bu aqta kitap müellifi Mihail Yakuboviç Qırım.Aqiqatqa bildirdi.
«Kitap 50 müellifniñ tecimeiyalını ve 120 işni aydınlata. Kitapta añılğan alimlerniñ çoqusı – din felsefecileri, qadı ve Qırım hanlığınen bağlı diger meşur şahıslardır», – dep qayd etti müellif.
Onıñ aytqanına köre, kitapqa Osmanlı imperatorlığı tarafından kontrol etilgen Ukraina cenübindeki topraqlarnıñ belli erbapları da kirsetildi.
«Başında tercimeiyalları berile, soñra eserler ve olarnıñ neşir etilgen, saqlanğan yerleri, elyazmalar olsa, edebiyat cedveli berile, eñ müimi de, fotoresimler… Aynısı qırımtatar tilinde de bar», – dep qoştı tedqiqatçı.
Onıñ qayd etkenine köre, kitapqa Türkiye ve Almaniya kütüphanelerinde tapılğan elyazmalar kirdi. Kitap üzerinde iş on yıl devam etti. Kiriş sözüni QMC MDİ müftisi Ayder Rustemov ve Diniy idare alimler şurasınıñ yolbaşçısı Suleyman Hayrullayev yazdılar. Müellifniñ aytqanına köre, kitap ilmiy toplulıq içün neşir etildi.
«Kitap eki tilde basılğan, iş serlevaları ve alimlerniñ adları osmanlıca/arapça yazılğan, onı em Türkiyede, em arap memleketlerinden, em ğarbiy ilmiy dünyada oquy bileler», – dedi Yakuboviç. Onıñ bildirgenine köre, kitapnıñ cemi bir qaç yüz nushası bar.
2016 senesi noyabr ayında Qırımdan köçip kelgen musulman cemiyetleri toplaşıp, esas Ukrainada Qırım Muhtar Cumhuriyeti musulmanlarınıñ diniy idaresini qurmağa qarar aldı. Müfti olaraq Ayder Rustemov saylandı. 2017 senesi oktâbr ayında Ukraina medeniyet nazirliginiñ millet ve din departamenti Rustemov yolbaşçılığında Qırım Muhtar Cumhuriyeti musulmanlarınıñ diniy idaresini qayd etti.
