Qıtay ve Rusiye sentâbr ayında «Şimal-İşbirligi 2024» adlı arbiy talimlerini keçirecekler. Bu aqta Qıtay halq cumhuriyetiniñ mudafaa nazirligi bildirdi. Talimlerde arbiy-deñiz flotu ve aviatsiya iştirak etecekler. Manevrler Ohotsk ve Yaponiya deñizlerinde ve olarnıñ ava boşluğında yapılacaq.
Nazirlikniñ bildirgenine köre, talimlerniñ maqsadı – «strategik işbirligini pekitmek ve havfsızlıq telükelerine qarşı çıquv azırlığını quvetleştirmektir».
Böyle talimler – «Şimal/İşbirligi-2023» – 2023 senesi iyulniñ 20-nden 23-ne qadar Yaponiya deñizinde oldı. Bu yazda Rusiye arbiy gemileri Qıtaynen beraber Qıtaynıñ cenübiy yalısında iyul ayında keçirilgen «Deñiz işbirligi – 2024» talimlerinde iştirak etti.
Soñki yılları Qıtay ve Rusiye yaqınlaşıp, dostluqlarını «sıñırsız» dep adlandıralar, eki memleket de NATOnen duşman munasebetlerinde buluna. İyul ayında aydınlatqan beyanatlarında NATO liderleri Qıtay Rusiyeniñ Ukrayinağa qarşı istilâsında «müim bir aracı» oldı, bu ise Pekinni NATOnı «qarşılaşuvnı qozğamaq» aqqında tenbilemege mecbur etti, dep bildirdi.
Qıtay Ukrayinada zıddiyet tarafı olmay, dep bildire, lâkin ğarbiy liderler Pekinni Moskvağa siyasiy ve iqtisadiy ceetten qoltutqanı içün tenqit ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
