Qıtay Tış işler nazirligi Ukrayinada eki Qıtay vatandaşınıñ esir alınğanı aqqında malümatnı izaatladı – bu aqta müessiseniñ vekili Lin Tszân bildirdi, dep haber ete halqara kütleviy haber vastaları.
«Qıtay tarafı bu malümatnı Ukrayina tarafında teşkere», – dedi o.
Tszân bildirgenine köre, Qıtay ükümeti «vatandaşlarından silâlı zıddiyetlerden uzaq olmağa» ve cenkte iştirak etmemege rica etken edi.
Aynı vaqıtta, o, Ukrayinada çoq sayıda Qıtay arbiyi bulunğanına dair malümatnı «sebepsiz» dep adlandırdı.
Aprelniñ 8-nde Ukrayina prezidenti Volodımır Zelenskıy Ukrayina arbiyleri Donetsk vilâyetinde Rusiye ordusı erkânında cenkleşken eki Qıtay vatandaşını esir aldı, dep bildirdi. O, Tış işler nazirligine Pekinnen bağlanıp, Qıtay akimiyetiniñ fikrini almağa vazife berdi. Esirler Ukrayina telükesizlik hızmetinde qala, tahqiqat devam ete.
Aynı vaqıtta Ukrayina prezidenti «işğalcilerniñ bölüklerinde Qıtay vatandaşları ekiden daa ziyade», dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
