Şimdilik Avropa Birliginiñ Qıtaynıñ Rusiyege silâ bermege planlaştırğanını tüşünmek içün sebepleri yoq – dep ayttı Avropa komissiyasınıñ prezidenti Ursula Gertrud von der Leyen martnıñ 5-nde Almaniya kantsleri Olaf Şolts ile yapqan matbuat konferentsiyasında.
«Şimdi bunıñ (Pekinniñ Rusiyege silâ berüv planları – QA) delili yoq, amma bunı er kün taqip etmelimiz», – dep ayttı o.
Aynı vaqıtta von der Leyen silâ berilse, Avropa Birligi Qıtayğa qarşı sanktsiyalar kirsetecekmi sualine tam cevap bermeyip, bu bir kerçek olsa, o vaqıt cevap olur, dedi.
Şolts ise Qıtay ükümeti «silâ bermeycek, dep ayttı», dep qayd etti, dep bildire Politico.
«İsrar etip, motitoring yapamız», – dep qoştı o.
ABD devlet kâtibi Antony Blinken Washington Qıtaynı Rusiyege arbiy yardım kösterilüviniñ aqibetleri aqqında «tam bir şekilde tenbiledi», dep bildirdi. NATO baş kâtibi Jens Stoltenberg ABDden soñ Qıtay Rusiyege Ukrayınağa qarşı cenkni devam ettirmesi içün silâ bere bile, dep qasevetlengenini bildirdi.
Qıtay Tış işler nazirligi fevralniñ 24-nde Rusiyeniñ Ukrayına ile cenkni bitirüv planını taqdim etti. Vesiqa 12 maddeden ibaret. Pekin, işbu maddeler uruş areketlerininh toqtatıluvına yardım etecek, dep tüşüne. Olarnıñ arasında – ateş ve uruşlarnıñ toqtatıluvı, barışıq muzakereleriniñ başlanması, bir taraflı sanktsiyalarnıñ toqtatıluvı ve ilâhre.
NATO baş kâtibi Jens Stoltenberg Qıtaynıñ planınen bağlı şübhelerini aytıp, Pekin «Ukrayınağa qanunsız istilânı takbih etmegeni içün» «büyük işançqa lâyıq degil», dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
