Qıtay Rusiye istilâcı dep adlandırılğan Birleşken Milletlerniñ Baş assambleyasınıñ qararına ilk sefer rey berdi. Bundan evel Qıtay Halq Cumhuriyetiniñ vekilleri bunıñ kibi qararlarnıñ leyhalarına rey berilgende bitaraf qala edi.
Rey berüv aprelniñ 26-nda oldı, lâkin kütleviy haber vastaları ve izaatçılar qararnıñ metnini ve Qıtaynıñ qoltutqanını tek şimdi kördi.
BM Avropa Şurasınen işbirligine bağışlanğan qararğa umumen 122 memleket qoltuttı. Qıtaydan ğayrı, Rusiyeniñ dostu sayılğan diger memleketler de rey berdi, hususan Qazahistan, Ermenistan, İndistan ve Braziliya.
Vesiqada «Rusiye Federatsiyasınıñ Ukrayınağa, bundan evel ise Gürcistanğa qarşı istilâsından soñ» Avropa ögünde olğan «emsalsiz meseleler» aqqında aytıla. İstilâ qurbanlarına ketirilgen «zararnı qarşılav» çağıruvı da bar. Rusiye – vesiqağa qarşı çıqqan beş memleketten biridir.
Ukrayınadaki cenk qararnıñ esas mevzusı degildir, şunıñ içün Qıtay ve diger memleketlerniñ qoltutuvı Rusiyeniñ Ukrayınada yapqanlarınen bağlı fikirleri deñişkeniniñ işareti olamı belli degil. Bundan evel Qıtay Moskvanıñ areketlerini tenqit etmeyip, bütün taraflarnıñ menfaatlarına emiyet bererek barışıq olmalı, dep bildirgen edi. Qıtay temsilcileri rey berüvni izaatlamağan edi.
Vesiqa muzakere etilgende Rusiye vekili vesiqadan Rusiye olğan maddesini alıp taşlamağa çağırıp, Ğarp memleketlerini «qararnı» siyasiyleştirgeninde qabaatladı.
Qıtay Halq Cumhuriyetiniñ reisi Si Tszinpin mart ayınıñ soñunda Moskvanı ziyaret etti. O, Pekin ve Moskva arasındaki strategik ortaqlıq ve dostluq aqqında ayttı. Ğarp memleketleri Qıtay Rusiyege silâ bere bile dep qasevetlendi, amma Pekinniñ Ukrayınadaki cenknen bağlı fikirleri deñişkeni bugünge qadar qayd etilmedi. Bir qaç kün evelsi Si Tszinpin Ukrayına prezidenti Volodımır Zelenskıynen telefonda laf etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
