Qırımtatar Resurs Merkezi Qırım işğali vaqtında cinaiy davalar boyunca 331 siyasiy tutuv ve taqipni qayd etti, 217-si qırımtatarlarğa qarşı yapıldı.
Teşkilât taqip etilgenlerni statuslarına köre 5-ke ayırdı:
- mahküm etilip koloniyada ceza çekken 154 kişi, 99-ı qırımtatarı;
- 39 insan sıñırlana ya da tüzetüv cezasını aldı, 23-ü – qırımtatarlar;
- 51 kişi SİZOda buluna, 35-i – qırımtatarı;
- 54 kişi azat etildi, 33-ü – qırımtatarı;
- 33 insan Rusiye tarafından taqip etile, 27-si qırımtatarı.
Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva haber etkenine köre, 2023 senesi Rusiye Federatsiyasında ve Ukrayınanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi. Açıq davalarnıñ sayısı ise 70,6% arttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
