İyünniñ 26-nda Ukrayınada Qırımtatar bayraq künü qayd etile – birlik, qırımtatarlarnıñ maneviy bağları ve kelecegini belgilev aqqı ve serbestlik oğrunda küreş timsali.
Altın tamğalı kök bayraq – qırımtatarlarnıñ milliy canlanuv timsalidir. 1917 senesi Birinci Qurultay bu bayraqnı milliy bayraq dep tasdıqladı. Qırımtatar bayraq künü 2010 senesinden berli qayd etile. Yarımadada peyda olğan adet esas Ukrayınada devam ete. Qırımnıñ özünde 2014 senesinden soñ bayraq künü qırımtatarlarnıñ Rusiye istilâsına qarşı tirenüv ve kimligini kösterüv timsali oldı.
Qırımtatar Milliy Meclisiniñ reisi Refat Çubarov Kyivde qırımtatar bayrağınıñ tantanalı köterilüvini ilân etti:
- Kyiv şeer şurası ve Kyiv şeeri devlet memuriyetiniñ binası ögünde saat 10:00-da
- Ukrayına Yuqarı Radasınıñ insan aqları vekâletlisiniñ ofisi ögünde (İnstitutskaya soq., 21/8) saat 10:30-da
- Vernadskiy Tavriya milliy universitetinde saat 12:00-de.
«Qırımtatar Milliy Meclisi ve qırımtatar bayrağını tantanalı köterüv merasiminiñ teşkilâtçıları semetdeşleri, vatandaşları, Ukrayına Silâlı quvetleriniñ arbiyleri, Ukrayına halq deputatları, yerli idare organlarınıñ deputatları ve Qırımnı sevgen ve onı tez azat etmek içün elinden kelgenini yapqan er kesni Qırımtatar bayraq kününi qabul etmesine çağıra. Yarın Kyivde ve tez vaqıtta serbest Qırımda körüşmek üzere!», – dep qayd etti o.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımtatar bayraq künü
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetelde ötkerile.
