Bugün qırımtatarlar içün esas mesele «öz tuvğan toprağınıñ Rusiye duşmanı tarafından zapt etilüvidir». Bu aqta Qırımtatar Milliy Meclisiniñ reisi ve Dünya qırımtatar kongressiniñ reisi Refat Çubarov noyabrniñ 22- nde, cuma künü, II «Crimea Global» halqara konferentsiyası Kyiv forumınıñ panel muzakerelerinde iştirak etip bildirdi, dep haber ete Qırım.Aqiqatnıñ mühbiri.
«Qırımtatarlar içün, diger halqlarda olğanı kibi, sınavlar çoq. Amma qırımtatar halqı içün bugün eñ müim mesele – toprağınıñ Rusiye duşmanı tarafından zapt etilmesidir! Bu duşman 240 yıl devamında qırımtatar halqını muntazam sürette yoq ete», – dedi Refat Çubarov.
Qırım.Aqiqat daa evel haber etkenine köre, noyabrniñ 21-22-nde Kyivde II «Crimea Global» halqara konferentsiyası keçirile, bu sene o, Ukrayinanıñ dünya Cenübi memleketlerinen işbirligine bağışlana.
Ukrayina prezidenti Volodımır Zelenskıynıñ barışıq formulası aqqında Prezidentniñ Qırım Muhtar Cumhuriyetindeki daimiy vekili Tamila Taşeva ayttı.
Qırımtatar Milliy Meclis reisiniñ birinci muavini, qırımlı jurnalist ve Kremlniñ siyasiy mabüsi Nariman Celâl işğal etilgen Qırımda vatandaşlarnıñ aq-uquqları ve serbestlikleri sert ve qanunsız sıñırlanğanını köstergen malümatnı bildirdi.
Eki kün devamında Ukrayina paytahtında dünyanıñ çeşit köşelerinden ekspertler ve fikir liderleri toplaştı: İndistan, Keniya, Braziliya, Sudan, Iraq, Meksika ve Afrika, Asiya ve Latin Amerikanıñ bir çoq memleketleri Qırımnen bağlı şimdiki sınavlarnı, em de Ukrayinanen işbirlik imkânlarını muzakere ettiler.
Forum muzakeresiniñ esas mevzusı istilâğa qarşı ve Rusiyeniñ müstemleke ıntılışlarınen küreş timsali olaraq Qırım oldı. İştirakçiler aşayt ve energetika telükesizligini teminlev, sovet mirasını kolonizatsiyadan azat etüv, Ukrayinanıñ maqsadlı memleketlernen iqtisadiy işbirlikni keñleştirüv meselelerini muzakere ettiler.
Konferentsiya programmasında panel subetleri ve yan tedbirler, aq qorçalayıcılarnen körüşüvler; boğday koridorını tiklev ve cenkniñ ekologik neticelerini muzakere etüv, tamır halqlar içün sınavlarnıñ talili, cenk sebebinden elâk olğan medeniy erbaplarnı añma bar edi. Bundan ğayrı, forum iştirakçilerine Ukrayina regionlarını ziyaret etmek, Rusiye istilâsınıñ aqibetlerini körmek ve siyasiy mabüslerniñ qorantalarınen körüşmek imkânı berildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
