Noyabrniñ 3-nde gece 16 qırımtatarından ibaret eyyet Rusiye işğal etken Qırımğa qayttı. Olar Qırımda tutulğan qadın-qızlarnı azat etmek talabınen Rusiye müessiselerine muracaat bermek maqsadınen Moskvağa bardı, dep haber ete “Qırım birdemligi” cemaat birleşmesi.
Delegatlar Rusiye Federatsiyasınıñ prezident memuriyeti, Rusiye Federatsiyası Baş prokuraturası ve Rusiye Federatsiyası insan aqları vekâletlisi Tatyana Moskalkovanıñ ofisine muracaatlar berdi. Muracaatlarğa bütün yarımadadan qırımtatarlarnıñ altı buçuq biñ imzası ilâve etildi.
İmza bergenler oktâbrniñ 15-nde apiske alınğan qırımlı qadınlarnıñ taqip etilüvini toqtatmağa ve olarnı acele azat etmege talap ete.
Apiske alınğanlarnıñ ana-babaları, uquqçı Nazim Şeyhmambetov, faaller ve aqsaqallar kirgen eyyetniñ ziyareti Rusiye uquq qoruyıcıları tarafından daima manialarğa rastkeldi.
Oktâbrniñ 30-ndan geceden berli olarnıñ mikroavtobusları Moskvağa ketkende beş kere toqtatıldı:
- Birinci kere Boguçarskiy rayonındaki (Voronej vilâyeti) İç işler nazirligi bölüginde oldı ve dört buçuq saat devam etti.
- Ekincisi – Hlevenskiy rayonındaki İç işler nazirligi bölüginde (Lipetsk vilâyeti), eyyet anda altı buçuq saat tutuldı. Delegatlarnıñ aytqanına köre, İç işler nazirliginiñ hadimleri “ekstremizm teşkerüvi yapılmalı”, dep ayttı.
- Üçüncisi Tula vilâyetinde, Venev şeerinde oldı, Moskvadan 200 kilometr uzaqta. Qırımtatarlarnı Rusiye yol patrul hızmeti toqtattı, soñra İç işler nazirliginiñ hadimi ve adiy urbada üç insan qoşuldı.
- Dördünci kere eyyet Koltovo yolunda toqtatıldı – Moskvadan 120 kilometrde. Rusiye uquq qoruyıcıları özüni cinaiy qıdıruv hadimleri olaraq tanıttı, betlerinde maska ve qollarında avtomat bar edi. Tutulğanlar Kaşira şeer okrugındaki Rusiye İç işler nazirligi bölüginden “memuriy uquq bozuvları, cinayet ve cemaatqa qarşı areketler olsa”, mesüliyet aqqında tenbiler aldı.
- Beşinci kere eyyet Moskvada toqtatıldı. Moskalkovanıñ ofisinden beş daqqa qalğan yerde. Yol patrul hızmetiniñ hadimleri bütün yolcularnıñ pasportlarını “teşkermege” aldı. Soñra eyyet iştirakçilerine vatandaş urbasında insanlar keldi. Tutulğanlar toqtatılğanlarınıñ ve vesiqaları ne içün berilmegeniniñ sebebini soramağa tırışıp, amma Rusiye uquq qoruyıcıları suallerine cevap bermedi. Vesiqalar teşkerilgen soñ tutulğan altı qırımlı Qırım mikroavtobusları qalğan yerge qaytacaqlar şartınen yiberildi.
Oktâbrniñ 16-nda Rusiye kontrolindeki Aqmescitniñ Kiyev rayon mahkemesi dördüni de eki ayğa SİZOğa yolladı.
Oktâbrniñ 28-nde haber etilgenine köre, Qırımda Rusiye uquq qoruyıcıları tarafından tutulğan Elviza Aliyeva, Nasibe Saidova ve Fevziye Osmanovanıñ analarına apiste tutulğan qızlarına bir şey yollamağa izin berilmedi.
Oktâbrniñ 29-nda Rusiye kontrolindeki Qırım Yuqarı mahkemesi beş bala anası Esma Nimetulayeva, terbiyeci Nasibe Saidova, student Elviza Aliyeva ve iş adamı Fevziye Osmanovanıñ advokatlarınıñ istinaf şikâyetlerini red etip, qırımlılarnı apiste qaldırdı.
Aq qorçalayıcılar qayd etkenine köre, Qırımda qırımtatar qadın-qızlarına qarşı açılğan ilk Hizb ut-Tahrir davası oldı.
“Hizb-ut-Tahrir" teşkilâtı Rusiyede terror teşkilâtı olaraq tanıla, lâkin bir çoq memlekette yasaqlanmay.
