Oturışuv qapalı oldı. Mahkeme «esnas iştirakçileri, şaat ve soy-soplarınıñ ayatı ve sağlığı içün telüke bar olğanından» esnasnı qapattı.
Azizovnıñ imayecisi Aleksey Ladin şimdi onıñ müvekkili psihologik-psihiatrik ekspertizada bulunğanını bildirdi. Terrorizmde qabaatlanğan qırımtatarlarnıñ davalarınen oğraşqan aq qorçalayıcılar böyle ekspertiza basqı yapmaq maqsadınen sıq-sıq keçirile, dep qayd etken edi. İnsannıñ bir patologiyası olmasa, onı hastahanege yerleştirmege kerekmey, dep tüşüne ola.
Ladin Aziz Azizovnıñ hastahanege yatqızılmasını qanunsız sayıp, onı şikâyet etecek ola. Qırımtatarınıñ sağlıq vaziyeti aqqında daa bir şey belli degil, advokat onı ziyaret etecek.
Bundan ğayrı, advokat Emil Kurbedinovnıñ bildirgenine köre, Cenübiy okrugınıñ arbiy mahkemesi müvekkili Enver Kroşnıñ apis müddetini avgust ayına qadar uzattı. Rusiye kontrolindeki Aqmescitniñ Kiyev rayon mahkemesi sabıq imam Remzi Kurtnezirovnıñ ev apsini uzattı. Mahkeme Kurtnezirovnı hastahanede psihiatrik ekspertizağa yerleştirmege qarar çıqarıp, evini terk etmek ve azbarında kezmek ricasını red etti.
Martnıñ 5-nde saba Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Tintüvlerden soñ FSB eñ az beş insannı tuttı, aralarında sabıq imam Remzi Kurtnezirov bar. O, ekinci derece saqatıdır.
Neticede Rusiye kontrolindeki Aqmescitniñ Kiyev rayon mahkemesi qırımtatar faalleri ve vatandaş jurnalistileri Memet Lümanov, Aziz Azizov, Rustem Osmanov ve Mustafa Abduramanovnı 2024 senesi mayısnıñ 4-ne qadar SİZOda qaldırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
