Cumaaqşamı künü, dekabrniñ 15-nde, Canköy rayonınıñ Avuz Qırq (Medvedevka) köyünde qırımtatarı Mustafa Murahasnıñ evinde tintüv keçirildi – Rusiye uquq qoruyıcıları «yasaqlanğan şeylerni» qıdırdı. «Qırım birdemligi» cemaat birleşmesi haber etkenine köre, neticede bir şey tapılmadı ve alınmadı.
Berilgen malümatqa köre, Rusiye İç işler nazirliginiñ hadimleri Avuz Qırqnıñ sakinine silâ ve narkotik qıdırmağa kelgen eken. Rusiye uquq qoruyıcıları ev saibinen bağlı haber kelgen, evinde «yasaqlanğan şeyler» ola bile eken, dep bildirdi.
«Saba saat 7-de mahkeme qararınen keldiler, üç kişi kirdi, eki şaat bar edi. Kim olğanlarını añlamadım, çünki o vaqıt daa uyanamadım yahşı», – dedi Mustafa Murahas «Qırım birdemligine».
Rusiye uquq qoruyıcıları er adamdan cep telefonlarını köstermege rica etti, Ukrayına haberlerini oquğanınen meraqlandı. Murahasnıñ aytqanına köre, tintüv tahminen 40 daqqa devam etti, Rusiye uquq qoruyıcıları yanında tek bir-eki dolap açtı. Murahas qararnı imzalamağa istemedi, amma vesiqanı oqudı, dep yazdı. Rusiye polisi kopiya qaldırmadı.
Rusiye uquq qroruyıcıları Murahasnıñ evinde keçirilgen tintüvni açıq şekilde izaatlamadı.
Dekabrniñ 16-nda Rusiyeniñ akimiyetke qoltutqan «Mash na volne» Telegram kanalı Canköy rayonınıñ 59 yaşında sakini Aleksandrniñ (soyadı aytılmay) patlayıcı maddeleri tapıldı, dep yazdı. Rusiye uquq qoruyıcılarınıñ malümatına köre, olarnı o, avgustnıñ 16-nda patlavlar olğan Mayskoye köyüniñ anbarından topladı.
O vaqıt silâ anbarları, transformator altstantsiyasında patlavlar oldı ve demiryolu zarar körgen, dep bildirilgen edi. Rusiye Mudafaa nazirligi Qırımnıñ şimalinde olğanlar «diversiya» ola, dep ayttı. Qırımda cinaiy dava açıldı. Şübheli ya da tutulğanlar aqqında malümat yoq edi.
Sentâbrniñ 7-nde Ukrayına Silâlı quvetleriniñ Baş komandanı Valeriy Zalujnıy Ukrayına arbiyleriniñ Qırımdaki Rusiye arbiy obyektlerine 2022 senesi avgust ayında kerçekleştirgen raketa darbelerini tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
