Link açıqlığı

Saatnıñ esas haberi

Rusiyede hırsızlanğan ve mahküm etilgen hersonlı qırımtatarını cenkke ketmege zorlaylar – ömür arqadaşı


Qırımda 6 yılğa mahküm etilgen qırımtatarı Rustem Osmanovnı Rusiye vatandaşlığını alıp cenkke ketmesine zorlaylar, dep bildirdi Osmanovnıñ ömür arqadaşı «Qırım aq qorçalayıcı gruppasına».

Al-azırda mahküm Rusiyeniñ Ulyanovsk şeerindeki koloniyada buluna.

Dekabr ayında aq qorçalayıcılar Rustem Osmanovnıñ mektübini derc etti. Anda mahküm 2022 senesi aprel ayında Kalançaktaki evine 12 silâlı Rusiye uquq qoruyıcısı keldi, dep yaza. Osmanovnıñ aytqanına köre, onı köteklep, yerge yatqızğanlar, qollarını bağlap ve başına çuval kiydirip yük maşinasına mindirgenler. Anda Rustemni köteklemege devam etkenler. Qırım ve Herson vilâyetiniñ memuriy sıñırında, Osmanovnıñ aytqanına köre, onı qorquzıp, yalan malümat bermege zorlağanlar. Rustemniñ bildirgenine köre, Qırımdaki Rusiye FSBsiniñ idaresinde onı elektrik aqımınen işkencege oğratqanlar. Rusiye uquq qoruyıcıları işkence malümatını izaatlamay.

2022 senesi aprel ayında Qırımdaki Rusiye mahkemesi Rustem Osmanovnıñ ükmüni çıqardı. Onı «Noman Çelebicihan qırımtatar batalyonında» iştirak etkeninde qabaatlap mahküm ettiler.

Hatırlatamız, Qırımda Rusiye mahkemesi tarafından «qanunsız silâlı birleşmede» iştirak etkeninde qabaatlanıp 5 yılğa üküm etilgen Herson vilâyeti Azovske köyüniñ sakini Ruslan Abdurahmanov Ukrayına akimiyetinden onı deñişmelerini rica ete.

2022 senesi sentâbrniñ 2-nde Rusiye kontrolindeki Aqmescitniñ Kiyev rayon mahkemesi Abdurahmanovnı beş yıl sert rejimli koloniyada qalmasına üküm etti. 2022 senesi dekabr ayında Ruslan Abdurahmanov Aqmescit SİZOsında yaramay şaraitlerde qala edi. Kamerada daa dört kişi bar edi: episine kün devamında töşekke oturmağa yasaqlanğan edi. Kamerada er kün tintüvler keçirile edi.

Hatırlatamız, 2022 senesi sentâbrniñ 2-nde Aqmescitteki Rusiye mahkemesi qırımtatarı Aydur Umerovnı 5 yıl sert rejimli koloniyada qalmasına üküm etti. Ukrayına aq qorçalayıcılarınıñ malümatına köre, Rusiye arbiyleri onı işğal etilgen Herson vilâyetinde hırsızladı.

2022 senesi oktâbrniñ 17-nde belli olğanına köre, Qırımdaki Rusiye mahkemesi qırımtatarı Artur Memetşayevni 6,5 yılğa azatlıqtan marum etti. İşğal etilgen Geniçeskte hırsızlanğanı aqqında «Qırımtatar resurs merkezi» bildirgen edi.

Rusiye kontrolindeki Aqmescitniñ Kiyev rayon mahkemesi qırımtatarı, Herson vilâyetinden taksici Rustem Gugurikni Rusiyede yasaqlanğan «Noman Çelebicihan qırımtatar batalyonında» iştirak etkeninde qabaatlap, 8,5 yıl sert rejimli koloniyada qalmasına üküm etti.

Hatırlatamız, 2022 senesi dekabr ayında Rusiye kontrolindeki Canköy rayon mahkemesi «Noman Çelebicihan batalyonında» qabaatlanğan Ukrayına vatandaşını 4 yıl ve 3 ay sert rejimli koloniyada qalmasına üküm etti.

Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG