Rusiyeniñ "Yedinaya Rossiya" firqasınıñ Qırım bölügi küzde olacaq Devlet duma deputatlarınıñ saylavlarından evel qırımtatarlarğa nisbeten siyasetini deñiştirdi – artıq firqa qırımtatarlarnı agressiv bir şekiled öz saflarına celp etmege tırışa. Bu aqta Qırım.Aqiqatqa qırımtatar cemaatçılarından biri adını gizli qaldırmaq şartınen ayttı.
Onıñ malümatına köre, birinciden bücet saasında çalışqan qırımtatarlarnı "Yedinaya Rossiyağa" qoşulmağa zorlaylar.
"Qırım ilhaqından soñ Rusiye firqasınıñ Qırım bölügi "Partiya Regionov" azalarından şekillendirildi ve reberi Vladimir Konstantinov deñişmedi. Akimiyet firqasınıñ Qırım reberligi qırımtatar cemaatı 2014 senesi sahte referendumnı boykot etkeni içün olarnen çalışmağa pek istemedi. Amma bu yıl sentâbr ayında olacaq Devlet duma saylavlarından eve akimiyet firqasınıñ qırımtatarlarğa nisbeten siyaseti birden deñişti, artıq bücette çalışqanlarğa firqağa qoşulsınlar dep basqı yapıla. Bir çoq kişi razı olmay ve işten ayırıla. Meselâ, Qarasuvbazardaki qırımtatar kitaphanesi bu sebepten yarım yıldan berli çalışmay – anda hadim qalmadı, "Selskaya nov" gazetasından anda yıllarnen çalışqan yekâne qırımtatar jurnalisti işten ayırıldı, böyle örnekler çoq", – dep tarif etti cemaatçı.
Onıñ fikirince, Rusiye akimiyet firqası bu şekilde bir qaç maqsadına irişmege istey.
"Birinciden, Qırımnıñ tamır olmağan ealisi arasında "Yedinaya Rossiya" reytingi tüşe, insanlar kün-künden alğan qararlarınen ayatlarını beter etken firqağa qoşulmay – mına firqacılar baqılmağan tarafqa yöneldi. Ekinciden, "Yedinaya Rossiya" soñu kelgenini añlap, Ukrayina siyasetçileri cinaiy ve atta terror teşkilâtı dep tanığan firqağa mümkün olğanı qadar çoq qırımtatarını celp etmege tırışa. Üçünciden, Qırım yarımadası cenk yolunen işğalden azat etilecek olsa, qırımtatarlarnıñ mında Ukrayinağa qoltutacağını añlap, "Yedinaya Rossiya" qırımtatar cemaatını bölmege istey. Olar qırımtatarlar işğalci memleketniñ akimiyet firqası saflarına qoşulmaqtan işsiz qalmağa isterler, dep añlamaylar", – dep qayd etti cemaatçı.
İşğal etilgen Qırımda taqip ve repressiyalar qırımtatar halqını yoq etmek içün yapılğan Rusiye genotsid siyasetiniñ devamı ve numayışı ola. Bu aqta Refat Çubarov derc etken Qırımtatar Milliy Meclisiniñ Divan beyanatında aytıla.