Ukraina Nazirler şurası fevralniñ 23-nde 2032 senesine qadar Qırımtatar tiliniñ inkişaf strategiyasını taqdirledi, dep haber ete müessiseniñ matbuat hızmeti.
Nazirler şurasınıñ resmiy saytında bu vesiqanı Vaqtınca işğal etilgen topraqlarnıñ reintegratsiya meseleleri nazirligi Qırımtatar Milliy Meclisi ve Ukraina ilimleri milliy akademiyasınen beraber azırladılar, dep aytıla.
Bu Strategiyanıñ esas vazifeleri qırımtatar tiliniñ ananeviy qullanıluvı içün şaraitler yaratmaq, qullanuv saalasını kenişletmek, qullanıcılarınıñ til aqlarını yerine ketirmek, qırımtatar tiliniñ bağ vastası olaraq prestijini arttırmaq ola.
Bundan ğayrı, vesiqanıñ vazifelerinden biri qırımtatar tilini UNESCO tasnifine köre kritik telüke altında olğan tiller cedvelinden çıqaruv ve «telükesiz» seviyesine çıquv ola.
Hatırlatamız, 2021 senesi aprelniñ 7-nde Ukraina Nazirler şurası Qırımtatar tiliniñ inkişaf kontseptsiyasını taqdirledi.
2021 senesi yanvar ayında Reintegratsiya nazirligi «cemaatçılıq ile elektron mesleatlar» içün qırımtatar tiliniñ inkişaf ve populârlaştıruv kontseptsiyasınıñ leyhasını derc etti.
