Kyivde dekabrniñ 15-nde «Ukrinform» matbuat merkezinde «BÜLBÜL» balalar içün qırımtatar tilini ögrenüv platforması taqdim etildi.
Platformanıñ taqdim merasiminde Ukraina medeniyet ve informatsion siyaset naziriniñ muavini Taras Şevçenko; leyha reberi Fatima Osmanova; sayt muarriri Cemile Suleymanova iştirak ettiler.
Bu mültimedia platforması Ukraina medeniyet ve informatsion siyaseti nazirliginiñ sımarışınen «Filcan» production studiyası tarafında yapıldı ve 0-dan 5 yaşına qadar balalarnıñ qırımtatar tilini ögrenmesi içün azırlanıldı.
«Şimdi qırımtatar tili meselesi pek aktual ve müim, çünki UNESCO cedvelinde qırımtatar tili ğayıp oluv telükesi altındaki tiller sırasına kire», – dep bildirdi Fatima Osmanova.
Qayd etilgenine köre, «BÜLBÜL» taqımı qırımtatar tilinde yañı mültfilmler ve ana-babalar ve ocalar içün qırımtatar tilini ögrenüv boyunca usuliyet materiallarını azırladı.
Leyha çerçivesinde tilşınaslar ve ocalar esas luğatiy mevzular boyunca qırımtatar sözleriniñ tercimesi ve telâffuzınen inkişaf ettirici varaqalarnı azırladı. Platforma halq ve müellif masallarını, yır, ders planlarını, oyun ve balalar içün icadiy ders materiallarını teklif ete.
Daa evel haber etilgenine köre, Ukraina Nazirler şurası qırımtatar tiliniñ latin urufatlı elifbesini tasdıqladı.
Ukraina Nazirler şurası aprelniñ 7-nde qırımtatar tiliniñ inkişaf kontseptsiyasına qoltuttı.
