Ükümet komiteti qırımtatar tili elifbesiniñ latin urufatı esasında tasdıqlanmasına qoltuttı, dep bildire leyhanı azırlağan Ukrainanıñ vaqtınca işğal etilgen topraqları meseleleri nazirligi.
«Ükümet eñ yaqın vaqıtta soñki qararını alacaq. Amma bugün qırımtatar tiliniñ saqlanması ve inkişaf etmesi içün müim bir adım attıq. Bıltır başlağan işniñ bir qısmı», – dep bildire baş nazir muavini Oleksiy Reznikovnıñ aytqanlarını müessiseniñ matbuat hızmeti.
Nazirlikniñ malümatına köre, teklif etilgen elifbe 31 ariften ibaret. Leyha 1991-1993 seneleri Qırımtatar Milliy Qurultayınıñ qararına esaslana.
«Qırımtatar tiliniñ latin urufatına keçmesine Qırımtatar Milliy Meclisi, qırımtatar tilşınaslarınıñ ekseriyeti, oca ve naşirler qoltuta», – dep aytıla müessise haberinde.
Leyha Ukraina institutlarınıñ mütehassıslarınen uyğunlaştırıldı.
Ukraina Nazirler şurası aprelniñ 7-nde qırımtatar tiliniñ inkişaf kontseptsiyasını tasdıqladı.
Bu mesele kün tertibinde birincilerden biri edi.
Daa 2015 senesi qırımtatarlarnıñ lideri Mustafa Cemilev Ukraina Medeniyet nazirliginden qırımtatar tiliniñ latin urufatını qullanmasını rica etken edi.
Daa evel berilgen malümatqa köre, 2014 senesi mart ayında Qırımnıñ Rusiye işğalinden soñ yarımadada qırımtatar tiliniñ kirill urufatından latin urufatına keçüv meselesi baqılmay qaldı.
