Ukrayina vaqtınca işğal etilgen topraqlarnıñ, şu cümleden Qırımnıñ reintegratsiyasına faal sürette azırlıq köre. İqtisadiy ve içtimaiy infrastrukturanı yañartmaq, em de er bir vatandaşnıñ aq-uquqlarını ve serbestliklerini teminlemek içün er taraflama programma azırlanıla. Birinciden, hususan, qırımtatar tedqiqatlarınıñ inkişafıdır.
Bu aqta oktâbrniñ 24-nde Rigada olıp keçken Qırım platformasınıñ üçünci parlament sammitinde Ukrayina Prezidentiniñ Qırım Muhtar Cumhuriyetindeki daimiy vekili Tamila Taşeva bildirdi, dep haber ete «Suspilne Krım».
«Biz insanlarnıñ yürekleri ve aqılları içün küreşmek kerekmiz, Qırım ve qırımtatarlar aqqında aqiqatnı bütün dünyağa tarqatmaq kerekmiz. Şunıñ içün qırımtatar tedqiqatlarınıñ inkişafı bizim ögde turğan vazifelerimizden biridir. Ukrayinanıñ birinci hanımı Ölena Zelenska ukrayin studiyalarını da qavrap alğan qırımtatar studiyalarınıñ dünya koalitsiyası yaratılğanını ilân etti. Bu, Qırımnıñ sesi eşitilmesi yolunda atılğan adımdır», – dedi Taşeva.
Daa evel belli olğanına köre, Kanadanıñ Alberta universiteti Kanada ukrayin studiyaları institutı çerçivesinde çalışqan milliy tedqiqatlar fakültetinde qırımtatar studiyaları stipendiya programmasını tesis etti.
Bundan evel iyünniñ 25-nde «Suspilne Krım» telekanalında «Qırımca qonuşmaq» adlı tasil leyhası yayınlanıp başlandı, dep bildirilgen edi. İlânğa köre, programma seyircilerini Ukrayinanıñ tamır halqı qırımtatarlarnıñ tili vastasınen Qırımnen tanıştıracaqlar. Leyhağa jurnalist, Yaponiyanıñ Ukrayinadaki elçihanesiniñ sabıq attaşesi Hirano Takaşi, muarrir Yevgeniya Opekunova ve Unitour leyhasınıñ meneceri Müslim Umerov yolbaşçılıq etti.
Bundan evel Ukrayina Nazirler Şurası qırımtatar tiliniñ inkişafını teminlemek içün isse qoşqanlarğa mukâfat berilüvine dair qararnı qabul etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.