İşğal etilgen Qırımda 2024 senesi 111 qanunsız yaqalav (olardan 28-i qırımtatarlarğa qarşı), 173 apis cezası (75-i qırımtatarı), 61 tintüv (35 qırımtatarı) oldı ve 281 kere adaletli mahkeme aqqı bozuldı (156-sı qırımtatarına qarşı). Keçken seneniñ malümatını Qırımtatar resurs merkezi (QRM) aydınlata.
Qırımda Rusiye uquq qoruyıcıları eñ çoq «casuslıq», «terakt azırlavı», «devlet hainligi», «Rusiye ordusınıñ itibarını tüşürüv» (adiselerden 50%-ından ziyadesi) şübhelerinen insanlarnı tuttı.
173 apisten 61-i Rusiye mahkemeleri tarafından çıqarılğan cezalarnen bağlı, 33-ü memuriy apis, 47-si ise yañı apis edi. Çoqusı Rusiye uquq qoruyıcıları tarafından qabaatlanğan maddelernen, em de «qırımlı musulmanlarnıñ davalarınen» bağlı.
Keçirilgen 61 tintüvniñ ekseriyeti 2024 senesiniñ başında oldı – yanvar ayında 4, fevral ayında 18, mart ayında 11 ve aprel ayında 15. Avgust ayında bir, sentâbr ayında eki, oktâbr ve noyabr aylarında birer tintüv keçirildi.
Qırımtatar resurs merkeziniñ yolbaşçısı Eskender Bariyev bildirdi ki, 2023 senesi Qırımda aq qorçalayıcılar 173 yaqalav, 65 tintüv, 217 tevqif, 186 sorğu, em de adaletli mahkeme aqqınıñ 300-den ziyade bozuluvı ve sağlıq aqqınıñ 50-den ziyade bozuluvını qayd etti.
Qırımtatar resurs merkeziniñ malümatına köre, Rusiye Qırım yarımadasını işğal etkeninden berli 370 siyasiy sebepli cinaiy dava qayd etildi, 228-i qırımtatarlarğa qarşı. Ukrayina Yuqarı Radanıñ vekâletlisi Dmıtro Lubinets bildirgenine köre, al-azırda 218 qırımlı siyasiy ve diniy sebeplerden taqip etile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.