Qırımtatar Resurs Merkezi noyabrniñ 21-nde Baqudaki SOR29 Ukrayina pavilyonınıñ programması çerçivesinde «Rusiye istilâsı, tamır halqlar ve iklim deñişüvi: Qırım ölçevi» muvaziy tedbirini keçirecek. Bu aqta Qırımtatar resurs merkeziniñ Facebook saifesinde haber etile.
Tedbirniñ spikerleri olaraq çıqışta bulunacaqlar:
- Eskender Bariyev – Qırımtatar Resurs Merkeziniñ İdare yolbaşçısı, Qırımtatar Milliy Meclisiniñ uquqiy ve tış işler bölüginiñ reberi.
- İgor Kraynov – «İSE im. prof. M.S.Bokarius» NNTs müendislik-tehnik ve arbiy tedqiqler laboratoriyasınıñ baş ilmiy hadimi. Ukrayinada nam qazanğan ilim ve tehnika erbabı, tehnik ilimler doktorı, ekologiya kafedrasınıñ professorı.
- Boris Babin – uquqiy ilimler doktorı, professor, Qırımtatar resurs merkeziniñ eksperti.
- Yevgeniy Hlobistov – iqtisadiy ilimler doktorı, «Kyiv-Moğıla akademiyası» milliy universitetiniñ ekologiya kafedrası professorı, Ukrayina İqtisadiy İlimler Akademiyasınıñ akademigi, Qırımtatar resurs merkeziniñ Etraf müitini qorçalav ve Qırımnıñ turğun inkişafı ekspert şurasınıñ azası.
- Lüdmila Korotkih – Qırımtatar resurs merkeziniñ uquqçısı.
«Tedbir devamında ekspertler Rusiyeniñ Qırım işğali ve büyük silâlı istilâsınıñ iklim deñişüvine tesiri, Rusiye tarafından BMniñ tamır halqlar aqları beyannamesi ve BMniñ biologik çeşitlik şartnamesiniñ qaba bozulğanı, Qırımdaki tamır halqlarnıñ vaziyetine menfiy tesiri, Qırımnıñ halqara ekologik programmalardan tış qaldırılması, em de uquqiy ve siyasiy ölçüdeki halqara vesiqalarğa aktual meselelerni kirsetmek kerekligi, hususan, ekotsidniñ şartlı cinaiyleştirilmesiniñ inkişafı», – dep aytıla Qırımtatar resurs merkeziniñ haberinde.
«Ukrayina tabiat qorçalayıcı gruppasınıñ» ekspertleri Rusiyeniñ cenk gemileri, suv astı gemileri ve esas Ukrayinağa qarşı raketa atuvları Qara deñizni ve Qırımnıñ unikal tabiiy yerlerini yoq eteler, dep haber ete ediler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
