Qırımtatar Milliy Meclisi Ukrayina öz topraqları ve suverenitetini, hususan Qırımnı berip, «uzlaşuvlarnı» qabul etmemeli, dep ayttı.
Qırımtatar Milliy Meclisiniñ reisi Refat Çubarov tarafından derc etilgen beyanat ğarbiy matbuat vastalarında Rusiye Federatsiyasınen ola bilecek barışıq muzakereleri ve Ukrayinadan, hususan Qırımdan territorial uzlaşuvlar vastasınen barışıq yapılacağı aqqında haberler peyda olğan soñ aydınlatıldı.
Beyanatta Qırımtatar Milliy Meclisi cenkniñ tez bitmesi ve adaletli barışıqqa irişilmesi içün, amma Ukrayinanıñ topraq bütünligini tiklev esasında samimiy areket ete, dep aytıla.
«Qırımtatar Milliy Meclisi emin ki, Rusiye Federatsiyasınıñ Qırımğa ve Ukrayinanıñ diger işğal etilgen topraqlarına qast etüvinde er angi uzlaşuv tek beklenilgen barışıqnı ketirmeycek degil, yañı arbiy ve siyasiy zıddiyetlerniñ peyda oluv faktorları olacaq», – dep qayd etile beyanatta.
Beyanatta qayd etilgenine köre, «Qırım tamır qırımtatar halqınıñ vatanı ve Ukrayina devletiniñ ayırılmaz bir parçası ola».
«Böylece, Qırım yarımadasınıñ topraq mensüpligi, onıñ uquqiy statusı, siyasiy, iqtisadiy, içtimaiy, medeniy yaşayışınıñ teşkil etilüvi aqqında bir de bir qarar içün tamır qırımtatar halqınıñ saylavı ve Ukrayina devletiniñ razılığını alınmalı», – dep aytıla beyanatta.
Bundan evel Trumpnıñ sabıq mesleatçısı Brayan Lanza BBC telekanalına bergen intervyüsında yañı ABD prezidentiniñ memuriyeti Rusiye tarafından işğal etilgen Ukrayina topraqlarını qaytarmağa degil de, barışıqqa irişmege niyetlene, dep ayttı ve Kyiv içün «Qırım artıq yoq» dep qoştı.
O, yañı memuriyet Ukrayina prezidenti Volodımır Zelenskıyden «barışıqnıñ kerçekçi şekliniñ» öz versiyasını taqdim etmesini rica etecegini ayttı.
«Ve prezident Zelenskıy muzakere masasına oturıp, yahşı, Qırım bizim olsa, tek o vaqıt barışıq ola bile, dep aytsa, bizge ciddiy olmağanını kösterir», – dedi o.
Donald Trumpnıñ taqımı Brayan Lanza Trumpnıñ ştabı adından aytmağanını bildirdi.
Bundan evel kütleviy haber vastalarında Trumpnıñ iddia etilgen «barışıq planı» aqqında tafsilâtlar peyda oldı. Yañı saylanğan ABD prezidenti eki memleket arasındaki cenkni buzlatuv planı çerçivesinde Avropa ve Büyük Britaniya askerlerini Rusiye ve Ukrayina orduları arasında 800 mil (1200 kilometrden ziyade) bufer zonasını temin etmege çağıra bile.
Trump prezident olaraq saylanğan soñ Ukrayinadaki cenkni «24 saat içinde» toqtatıp olur, dep çoq aytqan edi. Em Moskva, em Kyiv bu sözlerini şübhenen izaatladılar. The Washington Post gazetası Trump teklif etken barışıq planınıñ tafsilâtları aqqında yazğan edi: iddia etile ki, o, Ukrayinanıñ bazı topraqlarından vazgeçmesi, Rusiyeniñ ise diger şartlarından vazgeçmesini talap etip, em Moskvağa, em Kyivge barışıqqa irişmek içün basqı yapmağa istey. Trump plannıñ bu olğanını resmiy şekilde tasdıqlamağan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
