Ukrayinada 2022 senesi Qırımda Rusiye akimiyeti tarafından teşkil etilgen "Belediye deputatları ve qırımtatar cemaat teşkilâtlarınıñ vekilleri toplaşuvınıñ" dört iştirakçisini mahkeme etecekler. Bu aqta Qırım Muhtar Cumhuriyetiniñ matbuat hızmeti öz resurslarında haber ete.
Haberge köre, qabaatlanğanlarnıñ faaliyeti Ukrayina uquq qoruyıcıları tarafından "işbirlikçi faaliyet" olaraq tasnif etile (Ukrayina Ceza kodeksiniñ 111-1 maddesiniñ 6-ncı qısmı).
"Adise 2022 senesi aprel ayınıñ soñunda oldı. Qabaatlanğanlar bütün qırımtatar halqı adından Rusiye prezidentiniñ Ukrayinağa qarşı büyük istilâsını başlatmaq qararına qoltutqanlar. "Millet" propagandacı telekanalında çıqışta bulunıp, "tedbir" iştirakçileri işğal etilgen Qırımnı Rusiye dep tanıdı, Rusiye prezidentiniñ ve Rusiye ordusınıñ areketlerine qoltutmağa çağırdı, ve diger qırımtatarlarğa muracaat etip, yarımadağa qaytmalarını ayttı", – dep aytıla Qırım Muhtar Cumhuriyetiniñ Prokuratura haberinde.
Haberde qabaatlanğanlarnıñ adları ve soyadları aytılmay, amma medianen laf etmesine vekâleti olmağan ve gizli qalmağa istegen menba Qırım.Aqiqatqa Şevket Bekirov, Lilâ Vecatova, İbraim Şirin ve Arsen Yunusov aqqında aytıla, dep bildirdi. Al-azırda açıq izaatları yoq. Qabaatları mahkemede tasdıqlansa, 12 yılğa qadar apis cezası berile bile.
"Prokuratura işiniñ 5 yılı: milliy ve halqara ölçev. Kelecek viziyası" matbuat konferentsiyasında Qırım Muhtar Cumhuriyeti ve Aqyar şeeri prokuraturasınıñ reber vazifelerini eda etken Vitaliy Sekretar 2022 senesinden başlap Ukrayina prokurorları işğal etilgen Qırımdan 458 insannı işbirlikçilik, Rusiyege yardım etüv ve propagandada qabaatlav mesüliyetke çekildi, dep tarif etti.
2025 senesi fevral ayında Qırım Muhtar Cumhuriyetiniñ Prokuraturası Ukrayinada Qırımda rusiyeliler tarafından yapılğan 3800-den ziyade cenk cinayeti ve esas milliy telükesizlikke qarşı cinayetlernen bağlı cinaiy tahqiqatlar başlatıldı. O vaqıt Ukrayina mahkemeleri bu davalarnen bağlı tahminen 200 üküm çıqardı, daa 580 dava diñlendi, dep haber etildi.