Qırımtatar faali Zair Smedlâ avgustnıñ 24-nde qayd etilgen Ukraina Mustaqillik Künü arefesinde Qurman rayonınıñ Rusiye prokuraturasından alğan tenbi aqqında haber etti.
Faal derc etken vesiqada prokuraturağa «Qırımdaki vaziyetni kerginleştirmek içün avgustnıñ 24-ne keçirilmesi planlaştırılğan qanunsız ekstremist aktsiyaları aqqında haber etildi», dep aytıla. Zair Smedlâ da bu aktsiyalarnıñ iştirakçisi ola eken.
Vesiqada Rusiyeniñ «toplaşuv, miting, numayış, yürüş ve narazılıq aktsiyaları» qanunı bozulmaycaq, dep qayd etile.
Faal bu talaplarnı bozsa, memuriy mesüliyetke çekilecek, dep tenbilendi.
Avgustnıñ 24-nde Ukrainada Mustaqillik Künü qayd etile. Memleketiniñ 30-ıncı doğğan kününde tantanalı tedbirler keçirilecek. Kyivniñ merkezinde arbiy bayram paradınıñ keçirilüvi planlaştırıla. Avgustnıñ 23-nde Ukrainanıñ paytahtında 44 çetel memleketi ve teşkilâtınıñ vekili iştirakinen «Qırım platforması» halqara sammiti keçirilecek.
