Qırımda qırımtatar faali Ruslan Lümanovdan haber alınamay, dep bildirdi jurnalist Elvina Seitbulayeva.
«İşğal etilgen Qırımda faal Ruslan Lümanovnı hırsızlağanlar. Tünevin kündüz evden Krımenergoğa yol aldı ve yarım saattan soñ bağğa çıqmadı. Evine öyle de qaytmadı», – dep yazdı o.
«Tünevin gece 12-de Viberde mesac keldi: «Meni bugün bekleme, er şey yahşı. Yarın kelecem». Amma, şunı aytayım ki, bu Ruslanğa oşamağan bir şey. Onıñ laf üslübi degil, bu sözlerni mesaclarda bir vaqıt qullanmay», – dep tarif etti faalniñ ömür arqadaşı Evelina.
Ukrayına Devlet mülki fondunıñ yolbaşçısı Rustem Umerov Lümanovnıñ ğayıp oluvını «qırımtatarlarğa qarşı daa bir repressiya» dep adlandırdı.
«Ruslan – büyük dostumızdır, yıllarnen Qırımda qırımtatar siyasiy mabüslerine ve qorantalarına yardım ete, «mahkemelerge» bara, serbest Qırım içün cenkleşe», – dep yazdı Umerov.
Lümanovnıñ ailesi poliske muracaat berip, ğayıp olğanına dair ariza yazdı. Faalni soñki sefer maşinada Aqmescit rayonındaki Mamaq (Stroganovka) köyüniñ çıqışında körgenler.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
