Halqara ana tili kününde Ukrayınada qırımtatar tilinde online diktant olacaq. Metinni Rusiye apsinde tutulğan qırımtatar faali, «Avdet» qırımtatar gazetasınıñ jurnalisti Asan Ahtemov yazdı.
Bugün, fevralniñ 21-nde, saat 18:00-de (Kyiv saatınen) diktantnı diñlep, aktsiyada iştirak etmek mümkün – diktant NEFES teşebbüsiniñ YouTube saifesinde canlı yayında olacaq. Qırım.Aqiqatnıñ saytında da yayınlanacaq.
Metinni elnen latin ya da kiril urufatında yazmaq kerek. Aktsiya bitken soñ bir kün içinde yazılğan diktant fotoresimini ya da skanını qrm.nefes@gmail.com elektron poçtasına yollap, şeer, cep telefonı ve Facebook ya da Instagram saifesiniñ bağlantısını yazmaq kerek.
Diktantnıñ doğru metni fevralniñ 22-nde, saat 19:00-dan soñ NEFESniñ Facebook ve Instagram saifelerinde derc etilecek.
Hata yapmağan online diktant iştirakçileri bahşışlar alacaq, dep qayd etile haberde. Neticeleri NEFESniñ Facebook saifelerinde 2024 senesi martnıñ 21-nde ilân etilecek.
İşğal başlağan soñ Rusiye akimiyeti yarımadadanıñ umumtasil mekteplerinde qırımtatar ve ukrayın tillerinde derslerni eksiltti.
Aynı vaqıtta işğalden soñ Qırım yarımadasında qabul etilgen «Qırım Cumhuriyeti Anayasasınıñ» 10-uncı maddesi qırımtatar, ukrayın ve rus tillerini devlet tilleri dep ilân ete.
Bıltır qırımtatar tilinde online diktantnıñ metnini Rusiye apsinde tutulğan Qırımtatar Milliy Meclisi reisiniñ birinci muavini Nariman Celâl yazğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
