Herson vilâyetiniñ işğal etilgen qısmındaki Geniçesk rayonınıñ sakini Noman Çelebicihan «qırımtatar göñülli batalyonında» iştirak etüv davası boyunca mahküm etildi. Bu aqta Qırımtatar Resurs Merkezi haber ete.
Qayd etilgenine köre, Rusiye mahkemesi erkekni sert rejimli tüzetüv koloniyasında bulunmasınen 3,5 yılğa azatlıqtan marum etti.
Qırımtatar resurs merkeziniñ malümatına köre, 2014 senesinden başlap «Noman Çelebicihan qırımtatar göñülli batalyonında» iştirak etüv qabaatlavınen eñ az 41 kişi tutuldı.
Noman Çelebicihan qırımtatar batalyonı – 2016 senesiniñ başında esas Ukrayınanıñ işğal etilgen Qırımnen memuriy sıñırında qurulğan göñülli qırımtatar birleşmesidir. Batalyonğa qırımtatar siyasetçi ve cemaat erbabı, Qırım Halq Cumhuriyeti ükümetiniñ birinci Reisi, Qırımnıñ I Qurultay teşkilâtçısı, Litvaniya, Poloniya, Beyazrusiye müftisi Noman Çelebicihannıñ adı berildi.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
2023 senesi iyünniñ 1-nde Rusiye Yuqarı mahkemesi «Noman Çelebicihan qırımtatar göñülli batalyonını» Rusiyede yasaqlap, «terror» teşkilâtı dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
