Rusiye kontrolindeki Qırım Yuqarı mahkemesi «Noman Çelebicihan qırımtatar batalyonında» iştirak etkeninde qabaatlanğan 61 yaşında erkekniñ cezasını sertleştirdi, dep yaza RİA Novosti Rusiye devlet agentligi.
Rusiye mahkemesiniñ qararınen 61 yaşında qırımlı qabaatlı tanılıp, eki yıl umumiy rejim koloniyasında qalmasına üküm etildi, azatlığı bir yılğa sıñırlanacaq. Lâkin soñra istinaf oldı ve cezası sertleştirildi.
«Qırım Yuqarı mahkemesi dava malümatını incelep, istinaf şikâyetleriniñ delillerini ve prokurornıñ fikrini diñlep, Qırım Cumhuriyeti İslâm Terek rayon mahkemesiniñ ükmüni deñiştirmege qarar berdi. Birinci mahkemeniñ cezası beş yılğa arttırıldı, ilk yılını apishanede ve qalğanını umumiy rejim koloniyasında keçirecek», – dep aytıla haberde.
Mabüsniñ adı ve soyadı aytılmay. Mahkeme tutulğannıñ Rusiye vatandaşlığı bar, dep bildire. Qırım.Aqiqat bunı tasdıqlap olamay.
2014 senesi Rusiye Qırımnı işğal etken soñ qırımlılarnıñ çoqusı Rusiye pasportını almağa mecbur oldı.
İşğal etilgen Qırımda «Noman Çelebicihan qırımtatar batalyonında» iştirak etüv manaçığınen taqip etilgen onlarnen insan bar. Bazıları apis cezalarını aldı ve Rusiye apishanelerinde yata.
Rusiye FSBsi «Noman Çelebicihan qırımtatar batalyonını» 2022 senesi «terror teşkilâtları» cedveline kirsetti.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
