Şimdi o, Verhneuralsk (Çelâbinsk vilâyeti, Rusiye) apishanesinde tutula. Üküm çıqarılğan 2022 senesi avgust ayından 2023 senesi yanvarniñ 10-na qadar Abdurahmanov Aqmescitniñ №2 SİZOsında tutula.
«Al-azırda o, Verhneuralsk apishanesinde buluna. Onı bir qaç kere Rusiye pasportını almağa mecbur etken ediler, amma Ruslan Rusiye vatandaşlığını almay. Şimdi onı sert rejimli koloniyağa etap etmege azırlanalar, tam yeri belli degil, uzaq bir yer, Sibirge», – dep tarif etti ömür arqadaşı Feride Abdurahmanova.
Onıñ aytqanına köre, şimdi Abdurahmanovnıñ sağlıq vaziyeti fenalaştı, omurğanıñ boyun qısmında üç quyuuldıq alınmalı.
«Omurğadaki quyuldıq sebebinden miyine yeterli oksigen ketmey. Şunıñ içün bir qaç daqqa tutuluv, mikroinfarkt ola, bedeni çalışmay. Ameliyat acele yapılmalı. Bir ilâc bereler, amma bu yeterli değil», – dep ayta apayı.
Berilgen malümatqa köre, Rusiye uquq qoruyıcıları Ruslan Abdurahmanovnı 2022 senesi baarde Herson vilâyetiniñ Azovskoye köyünde tuttı. Rusiye mahkemesi tarafından «Noman Çelebicihan batalyonında» iştirak etüv qabaatınen beş yılğa üküm etilgen Abdurahmanov Rusiye uquq qoruyıcıları tarafından işkencege oğratılğanını aydınlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
