«Adlarını qaytarayıq – Qırımnı qaytarayıq» informatsion kampaniyası çerçivesinde Qırımtatar Resurs merkezi Qırımnıñ mesken yerleriniñ tarihiy adlarınen pazllarnı Ternopil vilâyeti Şumskıy litseyiniñ talebelerine berdi, dep aytıla Qırımtatar Resurs merkeziniñ saytında.
Şumskıy litseyinden ğayrı bu pazllar diger oquv yurtlarına ve Ukrayına şeerleriniñ medeniyet müessiselerine berildi. Qırımtatar Resurs merkezi bütün cedvelni aydınlatmadı.
«Hatırlatamız, çeşit auditoriyalarnen çalışmağa tırışamız, şunıñ içün «Yañı memuriy qurulışına köre mesken yerlerniñ tarihiy adlarınen Qırımnıñ territorial cemiyetler haritası» tahta pazllarını yaptıq», – dep aytıla haberde.
Qırımtatar Resurs merkezi qayd etkenine köre, «böyle kreativ yardımcı vastalar yardımınen daa çoq balanı Ukrayına Qırımınıñ kerçek tarihınen tanıştırmağa ve Qırım Ukrayına olğanını hatırlatmağa çaremiz olur!».
Berilgen malümatqa köre, Qırımtatar resurs merkezinde mesken yerlerniñ tarihiy adlarınen Qırımnıñ tahta haritası yapıldı.
Ukrayına prezidentiniñ Qırım Muhtar Cumhuriyetindeki vekili Tamila Taşeva bildirgenine köre, ükümet Qırım daa işğalden azat etilmezden evel toponimik adlarını deñiştirmege imkân berecek qarar azırlay.
Qırımtatar Milliy Meclisiniñ reisi Refat Çubarov işğal etilgen Aqyarğa tarihiy adını qaytarmağa teklif etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
