Herson vilâyetiniñ arbiy memuriyet yolbaşçısı Aleksandr Prokudin Rusiye ordusı Qırımnıñ şimalinde Ermeni Bazar şeerinde «Krımskiy Titan» himiya zavodında provokatsiya azırlay, dep tenbiley.
«Tirenüv küçleriniñ malümatına köre, rusiyeliler vaqtınca işğal etilgen Qırımnıñ Ermeni Bazar şeerinde himiya zavodında daa bir provokatsiya azırlay. Ola bilecek patlav tonnalarnen zeerli madde atacaq, insanlar ve tabiat içün ölüm telükesi peyda ola bile», – dep yazdı o, Telegram kanalında.
Prokudinniñ aytqanına köre, zavodda patlav sebebinden Qırım Muhtar Cumhuriyeti ve eñ azından yedi Ukrayına vilâyeti, Türkiye ve Rusiye özü zarar köre bileler.
Herson vilâyetiniñ arbiy memuriyeti himik telüke olğanda yapılacaqlarnı aydınlattı.
Bu malümatnı mustaqil menbalarda tasdıqlamaq şimdilik imkânsız ola.
Ermeni Bazar, bütün Qırım kibi, Herson vilâyetiniñ sol tarafı kibi Rusiye ordusınıñ işğali altında buluna.
Yanvar ayında Ukrayına milliy tirenüv merkezi bildirgenine köre, Ermeni Bazardaki «Krımskiy Titan» zavodında radiatsiya, himiya ve biologiya imayesiniñ ordu bölükleri, Rusiye arbiy tehnikası buluna.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
