Rusiye ordusı Qırımnıñ şimalinde yañı istihkam qurmağa ve okop qazmağa devam ete. Yañı istihkamlar Ermeni Bazardan cenüpte yerleşke İşün köyünde qayd etildi. Bunı Qırım.Aqiqatta ve Azatlıq Radiosınıñ «Shemı» leyhasında olğan uydu resimleri köstere.
«Krımskiy veter»Telegram kanalı İşün köyünden Voinka köyüne ketken yolda okoplar qazıla, Çatırlıq özeniniñ köprüne bir vagondan çoq ağa ketirildi, dep bildirgen edi.
«Qırım.Aqiqat ve «Shemı» jurnalistleri uyduda körülgenlerni teşkerdi – İşün köyüniñ artında Vorontsovka köyüne taba ketken yolda. Qışta mında bir orman yolağı bar edi. Mart ayında terekler kesildi ve uydu resiminde terekler yerine okoplar körüne.
Qırımnıñ Rusiye yolbaşçısı Sergey Aksenov Ukrayına fortifikatsiya ve mudafaa sayesinde yarımadanı işğalden aza etemeycek, dep bildirdi.
Fevralniñ 24-nde Ukrayına prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayına prezidenti ofisiniñ yolbaşçı muavini İğor Jovkva Qırım.Aqiqatqa intervyü berip, Ukrayınanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayınanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayına arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirdi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net/?utm_medium=otf&utm_campaign=proxy&utm_source=otf. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
