Qırımnıñ şimalindeki hastahaneler Rusiye arbiyleri tolu, dep bildirdi martnıñ 5-nde Ukraina prezidentiniñ Qırım Muhtar Cumhuriyetindeki temsilciligi.
«Ermeni Bazar, Krasnoperekopsk ve Canköy şeerleriniñ hastahaneleri yaralanğanlar tolu. Er birinde tahminen 1000-1500 yaralanğan bar. Bu hastahanelerge tek arbiyler alına, vatandaşlar ya şahsiy hastahanelerge muracaat etmege, ya da Aqmescit tarafına ketmege mecbur», – dep aytıla haberde.
Bundan ğayrı, martnıñ 4-nde, temsilcilikniñ malümatına köre, saat 15:00-dan 16:00-ğa qadar (Qırımdaki vaqıt) Kefe-Canköy tarafına Z işaretli 18 Rusiye yük maşinası keçti. Ters yönelişte – 4 yük maşinası ve 2 «Pantsir-S1» zenit raketa-top kompleksi. Olar, belki, zarar körgenler.
«Tahminen saat 15:30-16:00-larda Keriçten Canköy tarafına demiryoldan arbiyler tolu 23 vagonlı eşelon keçti. Şaatlar, böyle eşelonlar mında üç künden berli keçe, dep bildire», – dep bildire temsilcilik.
Aqmescit-Cankoy/Ermeni Bazar yönelişinde bir künde üç yük maşinası ve «Tigr» keçti. Soñkisiniñ beyaz boyalı yañı işareti bar edi – ⧖.
Temsilcilikniñ malümatına köre, fevralniñ 24-nde Rusiye arbiyleri Qırımnıñ şimalinde şahsiy evlerniñ azbarlarında top tertibatlarını qoydı.
Temsilcilik, Qırımdaki hastahaneler Rusiyeniñ Ukrainağa qarşı cenki vaqtında yaralanğan Rusiye askerleri içün gospital ola, dep bildirdi.
Fevralniñ 26-nda Krasnoperekopsktaki gospitalniñ tibbiy hadimleri Qırım.Aqiqatqa bildirgenine köre, mobil arbiy hastahane Herson ve Çaplınka tarafından ketirilgen yaralanğan arbiyler tolu.
Rusiye akimiyeti Qırımdaki Rusiye arbiyleri içün hastahaneler aqqında açıq malümat bermey.
Ukraina İç işler naziriniñ mesleatçısı Anton Ğeraşçenko esir alınğan Rusiye arbiyleriniñ cedvelini derc etti. Olarnıñ arasında Qırım ve Aqyar sakinleri bar.
Ukraina silâlı quvetleri Baş ştabınıñ malümatına köre, martnıñ 5-nde saba Ukrainada tahminen 10 biñ Rusiye arbiyi elâk oldı. Rusiye Federatsiyasınıñ Mudafaa nazirligi Ukrainada tahminen 500 Rusiye arbiyi elâk oldı, dep bildire.
Ukrainada Rusiye ücüm etken soñ arbiy vaziyet ilân etildi (2022 senesi fevralniñ 24-ü saba saat 5:00-dan başlap 30 künge). Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete ve «Ukrainanı askeriysizleştirüv ve denatsifikatsiya» ola, dep bildire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
