Mayısnıñ 30-nda Kyivdeki «Knıjkovıy Arsenal» XIII Halqara festivali çerçivesinde «Qırımnıñ serbest sesleri» kitabı taqdim etilecek. Kitap Ukrayina PENi, The Ukrainians Media, Vivat neşriyatı ve ZMINA İnsan aqları merkeziniñ leyhası olıp, Demokratiyağa qoltutuv milliy fondunıñ (NED) yardımınen kerçekleşti.
Kitap Kremlniñ 16 qırımlı mabüsiniñ ikâyelerini tarif ete – mında jurnalist, faal, qırımtatar halqınıñ vekilleri bar, olar Rusiye işğaline tirengeni içün 7 yıldan 19 yılğa qadar apis cezalarını aldı. Aralarında Nariman Celâl, Vladislav Yesipenko, İrina Daniloviç, Remzi Bekirov, Amet Suleymanov ve digerleri bar. Cıyıntıqta kitap qaramanlarınıñ mektüp, künlik defterleri, mahkeme nutuqları bar.
Taqdim merasiminde Qırımtatar Milliy Meclis reisiniñ birinci muavini Nariman Celâl, jurnalist ve yazıcı Rustem Halilov, medeniy reber Tetâna Teren, ZMINA talilcisi Nari Usenko ve Yekaterina Yesipenko – apiske alınğan Qırım.Aqiqatnıñ serbest hadimi Vladislav Yesipenkonıñ ömür arqadaşı. Tedbirni jurnalist ve yazıcı Olesâ Yaremçuk alıp baracaq.
«Qırımnıñ serbest sesleri» Ukrayina PENi ve ZMINA tarafından 2021 senesi başlatılğan #SolidarityWords kampaniyasınıñ devamı ola. O vaqıt Ukrayina yazıcı ve jurnalistleri işğal etilgen Qırımda apiske oğrağan zenaatdaşlarınıñ vekilleri oldı.
«Qırımnıñ serbest sesleri» kitabınıñ qaramanlarından biri – Qırım.Aqiqatnıñ serbest hadimi Vladislav Yesipenko. O, 2021 senesi martnıñ 10-nda Rusiye mahsus hızmetleri tarafından apiske alındı. Rusiye akimiyeti onı patlayıcı cihaznı saqlağanında ve taşığanında qabaatladı, lâkin aq qorçalayıcılar davasınıñ siyasiy sebepleri bar, dep ayta. 2022 senesi Aqmescitteki mahkeme Yesipenkonı 6 yılğa azatlıqtan marum etti. Jurnalist FSB tarafından işkence ve basqı aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
