İşğal etilgen Qırımnıñ Rusiye yolbaşçısı vazifesine üç namzet bar, dep bildirdi Rusiye nezareti altındaki yarımada parlamentiniñ reisi Vladimir Konstantinov.
Onıñ aytqanına köre, teklif Rusiye prezidenti Vladimir Putin tarafından keldi. Namzetler arasında yarımadanıñ şimdiki Rusiye yolbaşçısı Sergey Aksenov da bar.
«Laf üç namzet aqqında kete. Olarnıñ arasında şimdiki yolbaşçı Sergey Aksönov, em de KPRF ve «Yañı halq» firqasından vekiller bar. Ebet, biz Sergey Aksenovğa qoltutacaqmız, bunda iç bir sır yoq», — dep qayd etti Konstantinov.
Sentâbrniñ 6-dan 8-ne qadar Rusiye akimiyeti qanunsız bir şekilde ilhaq etken Qırım ve Aqyarda Rusiye Federatsiyası tarafından meydanğa ketirilgen Qanuncılıq Meclisine, Rusiyeniñ nezareti altındaki Qırım Parlamentine, em de şeer ve köy şuraları deputatlarınıñ qanunsız saylavları keçirildi.
Qırım Rusiye saylav komissiyasınıñ malümatına köre, Rusiye kontrolindeki Qırım parlamentine «Yedinaya Rossiya» (reylerniñ 74,87%-ı), LDPR (reylerniñ 5,71%-ı) ve KPRF (reylerniñ 5,15%-ı) keçkenler. Malışevniñ aytqanına köre, saylayıcılarnıñ 47,61%-ı iştirak etti, 702 141 kişi rey berdi.
Şimdi, Rusiye qanunlarına köre, Rusiye Federatsiyası nezaret etken parlament Putin tarafından teklif etilgen üç namzetten Qırım yolbaşçısını 45 kün içinde saylamaq kerek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
