Qırımnıñ Rusiye deputatları Ukrayına vatandaşlarına ait mulkniñ «devletleştirüvine» qoltuttı. Bu aqta Qırımnıñ Rusiye parlamentiniñ spikeri Vladimir Konstantinov Telegram kanalında bildirdi.
Onıñ aytqanına köre, cedvelde çeşit müessise ve bank, turistik, sport infrastrukturasına ait tahminen 500 obyekt bar.
«Qırımda Kyiv rejiminiñ yardımcılarnıñ mülkini tapqan terror ile küreş komissiyasınıñ işi devam etecek. Askerlerimizniñ ölümine, ruslarğa, barışıqsever ealige qarşı cinayetlerge para bergenlerge bizim toprağımızda kâr qazanmağa imkân bermeycekmiz», – dep yazdı Konstantinov.
Angi müessiseler aqqında aytılğanını Rusiye memurı aydınlatmadı. Lâkin, RİA Novosti yazğanına köre, Rinat Ahmetov, İgor Kolomoyskiy ve diger Ukrayına siyasetçileri ve iş adamlarınıñ mülki aqqında laf kete.
Daa evel belli olğanına köre, Rusiye Yaltadaki IMAX kinoteatrini «devletleştirmege» niyetlene. Konstantinovnıñ bildirgenine köre, o, Ukrayınanıñ sabıq baş naziri Arseniy Yatsenükke ait.
Bundan ğayrı, Konstantinov Rusiye Federatsiyası Qırımda 2022 senesi devletleştirilgen Ukrayına müessiselerini mezatqa çıqaracaq, dep aytqan edi. «Dost olmağan ecnebiylerniñ» müessiseleri yarış esasında satılacaq, dep qayd etti memur.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
