Qırım Rusiye işğali altında qalsa, Ukrayına ve mustaqilligi içün daimiy telüke olacaq. Bu aqta Qırımtatar Milliy Meclisiniñ reisi Refat Çubarov Azatlıq Radiosınıñ yayınında ayttı.
«Moskva Qırımnı kontrol altında tutıp, Ukrayına mustaqil devletiniñ kelecegi içün bütün imkânlarnı qapata. Çünki o, Moskva, Rusiye daima bir telüke olacaq. Ukrayına devleti içün telükeli bir şey. İqtisadiy inkişafnı endi aytmayım, çünki Qara deñiz, bütün limanlar. Şimdi zahire çıqarmaq içün er bir liman içün nasıl añlaşmaq kerek olğanını köremiz. Bizge bir şekilde tesir etmege tırışqanlar, bekleyik degenler, bunı ayta: devletiñizniñ mustaqilliginden vazgeçiñiz», – dep qayd etti o.
Çubarov Qırımdaki mudafaa inşaatlarını izaatlap, bazı yerlerde Rusiye akimiyeti arbiy tehnikanı çıqarıp, yarımada şimaline alıp kete, dep ayttı.
Uydu resimleri Qırımnıñ şimalinde «Ermeni Bazar» ve Perekop Rusiye keçiş noqtaları rayonında çift oko yolağı bar, dep köstere. Uydu fotoresimleri YE-105 yolunıñ eki tarafında da ve Sivaş gölü yanında yañı fortifikatsion inşaatlarnı kösterdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi. ABD Mudafaa naziri Lloyd Austinniñ fikirince, Ukrayınanıñ uruş meydanında teşebbüs köstermek içün «yahşı fırsatları» bar.
Soravlar köstergenine köre, ukrayınalılarnıñ 60%-dan ziyadesi işğal etilgen Qırımnıñ cenk yolunen azat etilüvine qoltuta – Rusiye ile cenk daa uzun olsa ve Ğarpnıñ yardımı eksilse bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net/?utm_medium=otf&utm_campaign=proxy&utm_source=otf. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
