Qırımtatar Milliy Meclisiniñ reisi Refat Çubarovnıñ fikirince, Qırımnıñ muhtar statusı deñiştirilmeli, şunıñ içün bir qaç qanun leyhası qabul etilmeli ve Ukrayına Anayasasına deñişmeler kirsetilmeli. Bu aqta o, «RBK-Ukraina» intervyüsında ayttı.
«Qırımnıñ muhtar statusı qalsın, amma deñiştirilsin, dep isteymiz. Rusiyeliler Qırımda birinci yerde olmağa isteyler. Biz ise Qırım azat etilgen soñ bütün milletlerge aynı aq berilmesini isteymiz. Aynı vaqıtta qırımtatar halqı saqlanıp inkişaf etmeli», – dep qayd etti Çubarov.
Onıñ qayd etkenine köre, Ukrayına Anayasasınıñ «Qırım Muhtar Cumhuriyeti» maddesine deñişmeler kirsetilmeli. «Bunıñ içün bir qaç qanun leyhasınıñ qabul etilmesini talap etemiz», – dep ayttı Meclis reisi.
Onıñ bildirgenine köre, Ukrayına Anayasasında Qırım muhtariyetiniñ ayrı status menbası qırımtatar halqınıñ Ukrayınanıñ tamır halqı olaraq kelecegini belgilev aqqı olmalı.
«Kimse Qırımnıñ kelecegini, 2014 senesi olğanı kibi, qırımtatarlarsız belgilememeli», – dep qayd etti Çubarov.
Onıñ bildirgenine köre, 10 yıldan berli ketken cenk muhtariyet añlavını «biraz toksik» yaptı.
«Ukrayınalılarnıñ bir qısmı «muhtariyet» sözüni eşitkende bu separatizm yolu olğanını tüşüne. Amma biz bu meseleni Ukrayına devletiniñ topraq bütünligini bozmayıp çezmege isteymiz. Qırımda Ukrayınanı pekitmege isteymiz», – dey Çubarov.
Meclis reisi Ukrayına cemiyetiniñ büyük qısmı Qırım aqqında aytılğanda muhtariyetke qoltuta, dep qayd etti.
«İçtimaiy tedqiqatlarnıñ raqamlarını kördim. Birinde ukrayınalılarnıñ 51%-ı Qırımda qırımtatar halqınıñ aqlarını yerine ketirip, muhtariyet qalmaq kerek olğanını añlay, dep aytıla», – dep ayttı o.
Ukrayına prezidentiniñ Qırım vekili Tamila Taşeva al-azırda Qırımnıñ işğalden azat etilgen soñ ola bilecek eñ az üç statusı baqıla, dep bildirgen edi.
Bundan evel Ukrayına prezidentiniñ ofis yolbaşçı muavini Mıhaylo Podolâk Qırım işğalden qurtarılğan soñ muhtariyet statusı lâğu etile bile, dep tahmin etti. Memurnıñ fikirince, unitar bir devlette muhtariyetniñ olması separatist baqışları içün elverişli olacaqtır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
