Aprelniñ 22-nde Qırımnıñ Qarasuvbazar rayonındaki Bağça Eli (Bogatoye) köyünde qırımtatarı Eldar Fetlâyevniñ evinde «tahqiqat tedbirleri» keçirildi.
Faallerniñ malümatına köre, saba saat 8-de Fetlâyev advokat Edem Semedlâyevge telefon etip, Rusiyeniñ Ekstremizm ile küreş merkeziniñ hadimleri evini tintkenini haber etip oldı. Er adam oña qarşı cinaiy dava olmağanını da bildirip yetiştirdi.
Semedlâyevniñ bildirgenine köre, qırımtatarına qarşı protokol tizile, onı haberi olmağan bir cinaiy dava boyunca şaat olaraq sorğuğa çekeler. Fetlâyev, vatandaşnıñ özüne ve yaqın soy-soplarına qarşı şaatlıq etmemege aqqını bergen Rusiye Anayasasınıñ 51-inci maddesine esaslanıp, şaatlıq etmekten vazgeçti.
Tintüv yarım saattan soñ bitti, kimse tutulmadı. Fetlâyevniñ evinde keçirilgen «tahqiqat tedbirleri» vaqtında tehnika (planşetler) ve CD-disk alındı, dep haber etti faaller.
Aq qorçalayıcılarnıñ malümatına köre, Qırımda Rusiye quvetçileri üç ay içinde 126 qırımtatarını tuttı.
Facebook Forum