Qırımda keçken künü 450 kilometrden ziyade yalı boyu teşkerildi, eki yüz kilometrden ziyade yalı boyu Rusiye tankerleri Keriç boğazında batqan soñ mazut izlerinden temizlendi, dep bildirdi Rusiyen Fevqulâde vaziyetler nazirligi.
«Qırımda bir kün içinde yalı boyunıñ 450 kilometrden çoq teşkerildi. Tahminen 212 kilometr temizlendi. 654 tonna kirli qum ve topraq toplap çıqarıldı», – dep aytıla haberde.
Aqyar civarında 640 tonna kirli topraq toplandı, 620 tonnası çıqarıldı. Qara deñizniñ yedi biñ kilometr kâreden ziyade suvları teşkerildi, 52 biñ metr kâreden ziyadesi ise sorbentnen temizlendi. Şimdi Rusiye Fevqulâde vaziyetler nazirliginiñ dalğıçları Vitâzevo iskelesi yanındaki suvlarnı mazuttan temizley, dep bildire matbuat hızmeti.
Episi olıp iş başlanğanından berli mazutnen kirlengen 178 biñ tonnadan ziyade qum ve topraq toplandı.
Qırım.Aqiqat bildirgenine köre, mazut taşığan eki «Volgoneft» tankeri bazar künü, dekabrniñ 15-nde, resmiy malümatqa köre, furtuna sebebinedn Keriç boğazında battı.
Tankerler batqanı içün cermay töküldi. Rusiye kütleviy haber vastalarınıñ malümatına köre, «Volgoneft-212» 4300 tonna mazut taşıdı. Shot ve Baza «Volgoneft-239» tankerinde de aman-aman aynı kölemde mazut bar edi.
Rusiye Deñiz qurtaruv hızmeti Keriç boğazında dekabrniñ 15-nde tankerlerniñ batması neticesinde Qara deñizge 2,4 biñ tonna cermay aqıp ketti, dep bildirdi.
Qırımnıñ Rusiye yolbaşçısı Sergey Aksenov Qırımda mazut çıqaruvları ile bağlı vaziyet, tahminlerge köre, daa beterleşe bilecegini, buzlav ölçüsiniñ Rusiyeniñ Krasnodar ülkesiniñ yalı boyunda qayd etilgen seviyege çıquv telükesi yüksek olğanını bildirdi.
Ukrayina ekologiya nazirligi tanker qazasından soñ mazutnıñ tökülüvi planktonnıñ ölümine, balıqlar, deñiz quşları ve diger canlı organizmlerniñ zeerlenmesine, deñiz nebatatı ve ayvanatınıñ yaşağan yeri olğan tüp çökündileri ve yalı boyu alanlarınıñ kirlenmesine ketirecegini bildirdi. Müessise esaplağanına köre, felâketten Qara deñizniñ ekosistemasına 14 mlrd dollardan ziyade zarar ketirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
