Ukrayına Mudafaa nazirligi Baş istihbarat idaresiniñ vekili Andriy Yusov Ukrayına Qırımnı işğalden qurtaruvınıñ bir qaç stsenariyini azırlay, dep bildirdi. Bu aqta o, «Ukrayınski Novını» neşirine intervyü berip ayttı.
«Vaziyet ketişatınıñ farqlı stsenariyleri bar. Ukrayına bunıñ tez vaqıtta ve Ukrayına imayecileri içün eñ az zararnen olması içün elinden kelgenini yapa. Ortaqlarımıznıñ arbiy yardım kösterilüvi ve umumen cebedeki vaziyetniñ inkişafı buña bağlı. Duşman da mudafaağa azırlana», – dep ayttı Yusov.
Jurnalistlerniñ Qırımnıñ em qaradan, em deñizden azat etüv variantlarınen bağlı suallerine cevap berip, Yusov er bir variantnıñ qararı «ayrı alınacaq», dep ayttı.
«Angisi ve ne vaqıt semereli olur – ayrı qarar alınacaq», – dep qoştı Yusov.
Yusov Qırımda Rusiye ordusı özü de çekile bile dedi, amma Ukrayına «bu stsenariyni beklemeycek».
«Diger stsenariyler de ola bile. Ukrayına quvetleri Qırımnı azat etüv oğrunda çalışa. İşğalciler iç ve tış vaziyetten sebep işğal altındaki topraqlarnı, hususan Qırımnı özleri terk etmege istese, bu doğru qarar olur, askerleriniñ ayatları qurtarılacaq ve Qırımda cenk cinayetlerine yol berilmeycek. Bizim vazifemiz diger stsenariylerni beklemeyip, bunı temin etmektir», – dep qoştı Yusov.
Ukrayına prezidentiniñ Qırım Muhtar Cumhuriyetindeki vekili Tamila Taşeva bildirgenine köre, «Qırımnı işğalden qurtarğan soñ Ukrayınanıñ esas vazifelerinden biri yarımadanıñ Rusiye ilhaqına yardım etkenlerni tapıp mesüliyetke çekmektir». Onıñ aytqanına köre, insanlıqqa qarşı cinayet ve arbiy cinayet yapqanlar, insan aqlarını bozğan ve genotsid olaraq tasnif etilgen cinayetlerni yapqanlar mesüliyetke çekilmeli.
Taşeva Qırım işğalden azat etilgen soñ Ukrayına Rusiye akimiyetinen işbirligi yapqan tahminen 10 biñ yarımada sakini mesüliyetke çeke bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
