Aqyardaki cermay bazasında olğan yanğından soñ qırımlılar Qırımtatar Milliy Meclisiniñ vekillerine Kefedeki cermay bazasınıñ koordinatlarını yollap başladı.
Bu aqta Qırımtatar Milliy Meclisiniñ reis muavini, Ukrayına halq deputatı Ahtem Çiygoz Ukrayına umummilliy telemarafonınıñ yayınında ayttı.
«Bilesiñizmi, bu areketlerge qoltutmaq içün bizge Rusiye işğalci ordusı içün yaqarlıq saqlanğan Kefe bazasınıñ koordinatlarını yollaylar. Qırımdaki vatandaşlarımız azat etüv tez vaqıtta olacağından emin», – dedi Çiygoz.
Bundan ğayrı, Çiygoznıñ aytqanına köre, Qırımda rusiyelilerniñ sayısı bayağı eksildi.
«Olar pek tez, hırsız kibi qaçalar. Hırsızlanğanlarına tez kelgenleri kibi. Qırımda olarnıñ sayısı milliondan az olğanını bilemiz. Logistik anda endi bir problem oldı, çünki köpürde balaban nevbetler bar», – dep qoştı Çiygoz.
Aprelniñ 29-na keçer gecesi Aqyarnıñ Kazaçya körfezinde cermay bazası yandı, dep bildirdi Qırım.Aqiqat mühbiri. Onıñ aytqanına köre, yanğın pek küçlü edi, tuman tek saba dağıldı. Gece saat ekilerde atış sesleri eşitildi.
Şeerniñ Rusiye yolbaşçısı Mihail Razvojayev yanğınnıñ sebebi uçucısızlarnıñ ücümi oldı, dep bildire. Onıñ aytqanına köre, yerli sakinler içün bir telüke yoq, yanğında kimse yaralanmadı. Kimse tahliye etilmeycek, amma adise civarlarında zeerli madde ölçüsi yapılacaq.
Bundan evel, aprelniñ 24-ne keçer gecesi, Qırım.Aqiqat mühbirleri Aqyardaki patlavlar aqqında bildirdi. Olarnıñ aytqanına köre, patlavlar Nahimov oquv yurtu ve Streletskaya körfezi yaqınlarındaki arbiy bölükler rayonında eşitildi. Zenit topu ve atıcı silâ ateşleri de eşitildi.
Malümatnı şeerniñ Rusiye yolbaşçısı Mihail Razvojayev tasdıqladı. Onıñ aytqanına köre, gece Aqyarğa suv üstü dronlar ücüm etti – bir uçucısız yoq etilgen, ekincisi özü patlağan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
