Rusiye tutqan qırımlılarnıñ qorantaları vekâletli şahıs vastasınen Ukrayınadan maddiy yardım alıp olacaq. Bu aqta «KrımSOS» cemaat teşkilâtınıñ uquqçısı Anastasiya Kalinina bildirdi, dep haber ete «Suspilne».
Bundan evel siyasiy mabüs qorantalarınıñ Ukrayına bankınıñ kartı ve Ukrayına operatorınıñ cep telefon nomeri olmaq kerek edi.
«Evelden bu paranı qorantalarnıñ vekâletli şahıslarına bermege imkân yoq edi, noyabr ayında deñişmeler qabul etildi, ümüt etem ki, bu mesele çezilir ve vekâletli olğan diger şahıslar vastasınen qoranta azaları para alıp olacaq. Bu, ebet, advokatlar degil ve problem devam ete, çünki bir qartanağa böyle yardım etmege istedik, amma yapamadıq, çünki mında kimsesi yoq, tanışları bile yoq», – dep tarif etti Kalinina.
Avgust ayında Ukrayına prezidentiniñ Qırım temsilciligi yarımadada qanunsız tutulğan 180 kişi aqqında bildirgen edi. 117-si qırımtatarı ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
