İyünniñ 1-nde bütün dünyada Balalarnı qoruv künü qayd etile. «Qırım balalığı» vatandaş teşebbüsiniñ statistikasına köre, yarımadada qırımlı musulmanlar taqip etilgeni içün eñ az 191 bala babasız yaşay. Bu balalarnıñ babaları apiske alındı, hususan «terror» maddeleri esasında – ekseriyeti «Hizb ut-Tahrir» teşkilâtında iştirak etkeninde qabaatlandı. Bu teşkilât Rusiyede yasaqlanğan, amma Ukrainada faaliyeti yasaq degil, halqara uquq işğal etilgen topraqta işğalci devletniñ qanunlarını kirsetmege yasaq ete.
«Hizb ut-Tahrir davası» boyunca apiske alınğan ve mahküm etilgen qırımlılarnıñ imayecileri olarnıñ taqibini siyasiy sebepli saya. Advokatlarnıñ qayd etkenine köre, bu davalar boyunca Rusiye uquq qoruyıcı organları tarafından taqip etilgenlerniñ çoqusı qırımtatarlar ola, ukrain, rus, tacik, azeri ve islâm dinini kütken diger millet vekilleri bar.
Bazı aq qorçalayıcı teşkilâtlar, şu cümleden Ukraina Helsinki insan aqları birligi, bu insanlarnı siyasiy mabüs dep saya. Bu yıl mayıs ayında ZMINA insan aqları merkezi 97 qırımtatarı siyasiy sebepli cinaiy taqipke oğratıla, 80-i apiste yata, dep bildirdi. «Qırımtatar faalleri terror faaliyetinde iştirak etüv uydurılğan qabaatlavlar boyunca on yıllarnen apis cezalarına mahküm etile», – dep tüşüne ZMINA aq qorçalayıcıları. Rusiye Tış işler nazirliginiñ spikeri Mariya Zaharova OSCE vekilleriniñ bu tarz beyanatlarına cevap berdi: tutulğan musulmanlarnı azat etüv çağıruvına o, «laf cinayet işlegeninden ve terror teşkilâtınıñ faaliyetinde iştirak etkeninden şübheli sayılıp tutulğanlar aqqında kete», dep bildirdi. «OSCE böyle faaliyetni bir şekilde aqlağanına inanmağa istemeymiz», – dep qoştı Zaharova.
«Hizb ut-Tahrirde» iştirak etüv qabaatlavınen tintüv keçirilgen ve ilk kişiniñ apiske alınğanından (Aqyardaki birinci «Hizb ut-Tahrir davası») aman-aman yedi buçuq yıl keçti. Böyle qabaatlavlar esasında apiske alınğan bazı insanlar endi azatlıqqa çıqtı. Faqat çoqusı daa koloniyada ve SİZOda qala.
Qırımlı siyasiy mabüslerniñ balaları babasız nasıl yaşay – fotoresimlerde baqıñız.
Facebook Forum