2020 senesi dekabrniñ 31-nde Ukraina Suriyeden eki qırımtatar qadınını ve yedi balanı qaytardı. Ukraina telükesizlik hızmeti «Suriyede bulunğan vatandaşlarnıñ «İslâm devleti» halqara terror teşkilâtınıñ iştirakçilerinen alâqalarnı barmı-yoqmı teşkerildi», dep bildirgen edi. Uzun teşkerüvlerden soñ Telükesizlik hızmetiniñ istihbaratı «Ukraina vatandaşlarınıñ terror faaliyetinen alâqası olğanını» qayd etmedi, dep bildirdi.
Qırımlı qadın yedi balasınen Suriyedeki lagerden Ukrainağa qayttı (video)
Yedi balası olğan qırımlı qadın Suriyeden Ukrainağa qayttı. Eñ az 2019 senesinden berli qoranta Suriye şimaliy-şarqındaki «Roc» qapalı lagerinde bulundı. Bu aqta tahliye esnasını aydınlatqan Qırım.Aqiqat mühbiri Suriye-Iraq sıñırından haber ete. Onıñ malümatına köre, Ukraina prezidentiniñ ofisi emrinen qadın ve balalarnı qaytaruv esnasına Ukraina Baş istihbarat idaresi, Tış işler nazirliginiñ mütehassısları qoşuldı. Iraq Kürdistanınıñ akimiyeti yardım etip, Ukraina vatandaşlarını Iraqtan çıqarmaq içün tranzit ayatını yaptı. Qoranta Ukrainağa qaytqan soñ Ukraina vatandaşları vesiqaları ğayrıdan tiklenecek, olarnı uquq qoruyıcı organları teşkerecek. Bu, Ukraina vatandaşlarınıñ vatanğa tahliye etilüviniñ ekinci basamağı oldı.