Rusiye uquq qoruyıcıları «qırımlı musulmanlar davasının» mabüsleri cankoyli Enver Halillayev, Arsen Kaşka ve Cadra (Lobanovo) köyüniñ cami imamı Vahid Mustafayevni Aqmescitteki hastahanege mecburiy mahkeme-psihiatrik ekspertizağa yolladı. Bu aqta «Qırım birdemligi» cemaat birleşmesine advokat Emil Kurbedinov tarif etti.
Advokat bu areketlerni «siyasiy sebepl cinaiy davalar boyunca apiske alınğanlarğa qarşı basqı usulı» dep adlandırdı.
«Birinciden, FSB terrorizm davalarında er şeyni sığdırmağa tırışa, hususan böyle ekspertizalarnı – müvekkilerimizniñ qabaatını isbatlaycaq delilleri olmağanı içün. Ekinciden, bu bir oyun, belki, birisi deli kibi areket etmege ister, amma böyle bir şey yoq edi. Üçünciden, bu telükeli bir şey. Bugün qanuniy bir sebep olmasa da, insanlar psihiatrik hastahanege qapatıla, yarın ise kimsege ilâc berilmeycek degen kefalet de yoq», – dedi Kurbedinov.
Martnıñ 5-nde saba Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Tintüvlerden soñ FSB eñ az beş insannı tuttı, aralarında sabıq imam Remzi Kurtnezirov bar. O, ekinci derece saqatıdır.
Neticede Rusiye kontrolindeki Aqmescitniñ Kiyev rayon mahkemesi qırımtatar faalleri ve vatandaş jurnalistileri Memet Lümanov, Aziz Azizov, Rustem Osmanov ve Mustafa Abduramanovnı 2024 senesi mayısnıñ 4-ne qadar SİZOda qaldırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
