Rusiye kontrolindeki Aqmescitniñ Kyiv rayon mahkemesi Ayşe Yakubovağa Rusiye uquq qoruyıcıları 2023 senesi avgust ayında tutqan aqayı Eldar Yakubovnı mahkemede fotoğa çıqarmağa tırışqanı içün para cezasını berdi. Bu aqta «Qırım birdemligi» haber ete.
Qayd etilgenine köre, qadın mahkeme vekiliniñ talabınen fotoresimni birden sildi, amma o, memnün qalmadı. Martnıñ 14-nde mahkeme 1 biñ ruble para cezasını berdi.
Uquqçı Rustem Kâmilevniñ qayd etkenine köre, Yakubova mahkeme vekiliniñ talaplarına mania olmadı ve olarnı birden yerine ketirdi. Amma mahkeme bu delilni qabul etmedi.
«Mahkeme binasına kirmezden evel insanlar onı ziyaret qaidelerini bilmek kerek. Ebet, insanlarnıñ 99%-ı bunı bilmey. Bilmemek bu maddege istinaden memuriy uquq bozuvı oladır. Dört çağına yetmegen Balanı baqqan qadın şimdi 60 kün içinde bu para cezasını ödemek kerek», – dep tarif etti Kâmilev.
Avgustnıñ 24-nde Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi.
Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Avgustnıñ 25-nde Rusiye kontrolindeki Aqmescitniñ Kiyev rayon mahkemesi tutulğanlarnı eki ayğa SİZOğa yolladı. Bu qarar alınğanda mahkeme binası ögünde oturışuvğa kelgen faaller kütleviy şekilde tutuldı. Umumen 23 kişi tutuldı, dep haber etildi, olarğa Rusiye ordusında askerlik celpnameleri berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
