Rusiyede Rostov-na-Donu Cenübiy okrugınıñ arbiy mahkemesi Bağçasaraydaki beşinci "qırımlı musulmanlar davası" mabüsleriniñ apis cezalarını mayısnıñ 23-ne qadar uzattı. Qırımlılar Amethan Umerov, Eldar Yakubov, Seytumer Seytumerov, Seydamet Mustafayev ve Ruslan Asanov ve Remzi Nimetulayev SİZOda qalacaqlar, dep haber ete "Qırım birdemligi" cemaat birleşmesine advokat Emil Kurbedinov.
Onıñ qayd etkenine köre, imaye tarafı Rusiye prokurorı israr etken sıñırlav tedbiriniñ uzatılmasına qarşı itiraz bildirdi.
"Prokurornıñ formal tahminleri yanğıradı, müvekkillerimiz azatlıqta olamaz, şunıñ içün izolâtorda tutulmalı. Biz böyle tahminlerniñ bir delili olmağanını ayttıq. Lâkin mahkeme delillerni qabul etmedi", – dep qayd etti advokat.
O, oturışuvda imaye tarafından beş şaat çıqışta bulundı, dep qoştı. Episi – qomşu, işdeş ve mabüslerniñ dostları – er birini müsbet taraftan ayttı.
Mahkeme martnıñ 2-nde nevbetteki oturışuvda dava tedqiqatını devam ettirecek.
«Qırım platforması» sammitiniñ ertesi künü, 2023 senesi avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi.
Aynı şu künü Rusiye kontrolindeki Aqmescitniñ Kiyev rayon mahkemesi üçüni apiske aldı – Ruslan Asanov, Amethan Umerov ve Remzi Nimetulayev eki ayğa SİZOğa yollanıldı. Tutulğanlar Rusiye Federatsiyası Ceza kodeksiniñ 205.5-nci maddesiniñ birinci qısmı – terrorcı teşkilâtnıñ faaliyetini teşkil etmek ve böyle teşkilâtnıñ faaliyetinde iştirak etmek – şübhesinen qabaatlandı. Laf Rusiyede yasaqlanğan «Hizb ut-Tahrir» teşkilâtı aqqında kete.
2024 senesi iyün ayında Aqmescitte Rusiye kontrolindeki Kiyev rayon mahkemesi altı qırımtatar faalini apishanede qaldırdı. Seydamet Mustafayev, Eldar Yaqubov, Abdulmecit Seitümerov, Ruslan Asanov, Amethan Umerov ve Remzi Nimetulayev 2024 senesi noyabrniñ 24-ne qadar SİZOda qalacaqlar.